في الطب، في غلطة صغيرة ممكن تعمل خوف كبير:
نلقى علامة مرتبطة بمرض معين، فنمشي طوالي من العلامة لاسم المرض
لكن العلامات الجلدية ما بتشتغل بالطريقة دي، نفس العلامة ممكن يكون وراها سبب شائع وبسيط، وسبب أقل شيوع، وسبب نادر ومهم، والطبيب بقرأ العلامة جوا بقية القصة
دي الفكرة البنسميها الاحتمال القبلي (pre-test probability)، لأن بعض الأمراض شائعة وبعضها نادر شديد، ولمن تظهر علامة معينة، الاحتمال بتحرك، مرات شوية ومرات كتير، حسب قوة العلامة وبقية القرائن، بس المرض النادر ما ببقى شائع فجأة عشان لقينا حاجة ممكن تحصل معاهو،
مثلا، لو علامة جلدية عندها عشرة أسباب معروفة، تسعة منهم شائعين وواحد مرض نادر، وجود العلامة ما بدي السبب النادر نفس فرصة البقية، الطبيب بسأل: عمر الزول كم؟ العلامة ظهرت فجأة ولا بالتدريج؟ في دواء جديد؟ في أعراض تانية؟ شكلها وتوزيعها كيف؟ وبعد داك كل إجابة بتحرك الميزان شوية،
عشان كده التشخيص في الحقيقة عملية تراكمية، علامة واحدة ممكن تفتح الباب، علامتين متوافقتين يقووا الشك، تاريخ مرضي مناسب يرفعو أكتر، وتحليل أو فحص ممكن يقفل الدائرة، أو يمشي بينا لاتجاه تاني خالص
وده سبب إن البحث في قوقل أو بالذكاء الاصطناعي مرات بعمل كارثة نفسية صغيرة، لما تكتب علامة واحدة، ومحرك البحث يوريك أكتر الأمراض غرابة وإثارة، فتلقى نفسك قفزت من بقعة في الجلد لمرض نادر في دقيقتين
الطبيب بعمل العكس، ببدأ من الشائع، ويشوف هل في حاجة في القصة تجبره يطلع للنادر، وفي المقابل، الشائع ما مفروض يخلينا نهمل علامة قوية، لأنو في علامات معينة وزنها أعلى من غيرها، وفي علامات لما تجي مع توقيت معين أو أعراض معينة بتغير الاحتمال بدرجة كبيرة، وهنا بتظهر قيمة الفحص الحقيق والخبرة،
عشان كده خلال السلسلة حنكرر كلمة «قرينة» كتير، ما كزخرفة، عشان نتذكر إن العلامة بتوجّه التفكير وما بتنهيهو،
وفي المرة الجاية حنشوف واحدة من أكبر المشاكل في قراءة الجلد عندنا: العلامة المكتوبة في الكتب باللون الأحمر، مرات ما بتكون حمراء أصلا في بشرتنا،