بعد ما عرفنا إن الاحمرار ممكن يتخفى في بشرتنا، السؤال العملي بكون: طيب نفتش وين؟
مرات الإجابة بتكون إننا نغير المكان البنعاين فيهو، ومرات نسيب اللون شوية ونستخدم اليد، مثلا في الشحوب، لون الوش ما أفضل مكان للحكم، خصوصا في البشرة الداكنة، الطبيب ممكن يشد الجفن السفلي ويعاين للملتحمة، أو يشوف الكف وخطوطو، لأن المناطق دي أقل تأثرا بلون البشرة الأساسي، الشحوب الواضح هناك ممكن يرفع الشك في الأنيميا، بس غيابو ما بنفيها، والتحليل هو البفصل
الصفار برضو مرات يكون صعب في الجلد، عشان كده العين بتساعدنا أكتر، خصوصا بياض العين، ومع الفحص ممكن نعاين لأماكن داخل الفم بدل الاعتماد على لون الوش واليدين براهم
والزرقة البتحصل مع نقص الأكسجين ممكن تكون أقل وضوح في الجلد الغامق، فنركز أكتر على الشفايف واللسان وباطن الفم، ومعاها طبعا قياس الأكسجين والحالة العامة، لأن اللون براهو ما جهاز قياس
وفي الالتهاب، اليد مرات تقول أكتر من العين: المنطقة أسخن؟ منفخة؟ قاسية؟ مؤلمة؟ ملمسها اتغير؟ نفس الالتهاب البظهر أحمر واضح في بشرة فاتحة ممكن يكون عندنا ما واضح، بس الحرارة والانتفاخ بظلوا موجودين
حتى الأظافر والفم عندهم قيمة، فراش الظفر ممكن يساعد في قراءة الدورة الدموية، واللسان وباطن الخد ممكن يورونا تغيرات ما واضحة فوق الجلد، الفكرة هنا بسيطة: فحص الجلد ما معاينة لون وبس، مرات أحسن معلومة تلقاها تحت الجفن، أو في الكف، أو جوه الفم، ومرات تلقاها بأصابعك قبال عينك
وده مهم في بشرتنا تحديدا، لأن اعتمادنا على «أحمر، شاحب، أزرق» بالحرف ممكن يخلينا نفوت العلامة وهي موجودة قدامنا، لو داير تشوف الأمثلة دي على بشرة زي بشرتنا، فتش في قوقل صور بعبارة (clinical signs dark skin)، عشان تعرف اختلاف أماكن الفحص، ما عشان تحكم على نفسك من صورة
وفي المرة الجاية حنتعلم حركة بسيطة بالقزاز، بتفرق بين لون جاي من الدم الجوا الأوعية، ولون الدم الطلع براها