التسعة بوستات الفاتت كانت تدريب للعين أكتر من كونها كلام عن أمراض، لكن من البوست الجاي حنبدأ نسمع الشهود واحد واحد، حنبدأ بالسكري والغدد والاستقلاب، لأن هنا في علامات بنشوفها كل يوم تقريبا: تغيرات في الرقبة، والساق، والقدم، والظفر، والجلد نفسه، وبعضها ممكن يسبق تشخيص المشكلة الداخلية
بعدها حنمشي للكبد والجهاز الهضمي، ثم الكلى، والمناعة، والدم، والقلب والرئة، وكل باب حنمسك فيهو العلامات البتضيف معلومة حقيقية، ونسيب العلامات الضعيفة في حجمها الطبيعي
بعد داك حندخل للأعصاب والسرطان والعدوى، وهنا في علامات نادرة جدا بس معرفتها مهمة، وفي أمراض قريبة من السودان والمنطقة حتاخد حقها براها، زي الميستوما، والليشمانيا، والسل والجذام
وحنمشي للتغذية والأدوية والحمل والنفس، لأن الجلد مرات بكتب أثر الحاجة الناقصة، ومرات بكتب أثر الدوا البناخدو، ومرات التغيير الجسدي الطبيعي هو البغير قواعد القراءة
وفي آخر السلسلة حنقلب الاتجاه
بدل ما نبدأ من المرض ونشوف علاماتو، حنبدأ من الحاجة القدامك: حكة من غير طفح، قرحة ما بتقفل، بقعة ما بتختفي بالضغط، اسمرار منتشر، فقاعات، أو تغير في الظفر، ونشوف الشهود المحتملين بترتيب منطقي،
وبعدها حنجمع العلامات اللي مفروض تمشي معاها للطبيب عاجلا، من العلامات البتستاهل موعد عادي، عشان السؤال في النهاية ما يكون «دي شنو؟» لكن يكون برضو «أتصرف متين؟»
ما مطلوب تحفظ السلسلة، ولا كل علامة تمر عليك تفتح ليك ملف أمراض، الفكرة إنك مع الوقت تعرف العلامة البتستاهل انتباه، وتعرف حدود العين ومتين الحكم ينتقل للفحص والتحليل، ولو داير تاخد لمحة من أول شاهد جاي، فتش في قوقل صور بعبارة (acanthosis nigricans dark skin)، وشوف شكلها على البشرة الداكنة
وفي المرة الجاية حنبدأ باب السكري والغدد، ونشوف كيف السكري مرات بكتب في الجلد قبال ما الزول يعرف إن عندو مشكلة في استقلاب السكر