أغلب حالات الشواك الأسود مرتبطة بمقاومة الإنسولين وزيادة الوزن، والحالات المرتبطة بالأورام نادرة شديد، النقطة المهمة إن النسخة النادرة غالبا ما بتتصرف زي الرقبة الغامقة البنعرفها من سنين،
الفرق العملي ببدأ من الزمن، زول رقبتو غامقة بالتدريج من سنين، ووزنو زايد، والعلامة مستقرة، قصتو بتمشي أكتر مع السبب الشائع، أما ظهور الشواك لأول مرة بعد الأربعين، وانتشاره بسرعة خلال فترة قصيرة، خصوصا لو بقى شديد ووصل مناطق ما متعودين نشوف فيها الشكل الشائع، هنا وزن القرينة بتغير،
في الشواك الأسود المرتبط بالأورام، الجلد ممكن يتغير بسرعة ويكون واسع بصورة ملحوظة، ومرات بدخل الفم والشفايف، أو تظهر تغيرات خشنة ومخملية في الكفوف، ولو التغير ده جا مع نقصان وزن ما عندو تفسير واضح، الطبيب ما بقيف عند مقاومة الإنسولين براها،
الارتباط الأشهر هنا بيكون مع بعض أورام الجهاز الهضمي، خصوصا المعدة، بس العلامة نادرة، ووجود الشواك الأسود براهو ما بكفي عشان نقفز للتشخيص ده، نفس الشاهد البنشوفو يوميا مع مقاومة الإنسولين ممكن يدخل في قصة مختلفة تماما لمن العمر والتوقيت والانتشار يتغيروا،
عشان كده بروتوكول القراءة هنا بسيط، أول حاجة ندي الشاهد الشائع حقو، لأن الأغلبية الساحقة من الحالات حميدة من الناحية دي ومرتبطة بالاستقلاب، وبعدها نسأل هل في حاجة في سلوك العلامة نفسها بتجبرنا نفتش أبعد؟
ودي واحدة من أهم قواعد السلسلة كلها، الندرة ما معناها نتجاهل العلامة، والشهرة ما معناها نخوف كل زول منها، الموقف المتوازن هو إننا نعرف العلامة الشائعة، وبعدين نعرف التغيير البخلي وزنها يزيد،
لو داير تشوف الفرق في الشكل، فتش في قوقل صور بعبارة (malignant acanthosis nigricans dark skin)، عشان تعرف ليه الانتشار والملمس والمكان مهمين مع اللون، ما عشان تربط أي رقبة غامقة بورم،
وفي المرة الجاية حننزل من الرقبة للساق، ونشوف بقع بنية صغيرة بتظهر عند ناس كتار عندهم سكري، منظرها واضح وشهادتها في الغالب أهدأ بكتير من اسم المرض،