الباب الرابع: حساسية شمس ما بتحمر

لمن الزول يطلع في الشمس الحارة، طبيعي انو الجلد يسخن، وممكن يحمر شوية أو يسمر مع الأيام، وفي ناس عندهم حساسية شمس عادية بتعمل ليهم حبوب صغيرة أو حكة بعد التعرض المباشر، ودي كلها تفاعلات بتنتهي بمجرد ما الزول يبرد ويستخدم مرطب أو كريم مضاد للحساسية

لكن القرينة بتختلف لمن التعرض للشمس يطلع طفح جلدي عنيد على شكل حلقات مدورة أو قشور بتشبه لدرجة التطابق مرض الصدفية أو الفطريات (Ringworm)، الطفح ده بظهر في الأماكن البتضربها الشمس زي فتحة الرقبة، والكتفين، والضراعين من بره، وبقعد أسابيع وما بختفي بسهولة

الحالة دي بنسميها الذئبة الجلدية تحت الحادة (Subacute cutaneous lupus erythematosus)، المرض ده بتوسط بين الذئبة الجهازية بتاعت الفراشة، والذئبة القرصية بتاعت الندبات، الميزة بتاعتو انو ما بسيب ندبات غائرة زي القرصية، لكنو عنيد ومربوط بأجسام مضادة معينة في الدم بتتفاعل بشراسة مع أشعة الشمس

في بشرتنا الداكنة، الطفح ده ما بظهر أحمر زاهي، وإنما بتشوف حلقات رمادية أو بنية عليها قشرة خفيفة، الزول ممكن يتعالج شهور على أساس انها فطريات من غير فايدة، والفشل العلاجي هنا بكون هو الجرس البخلي الطبيب يطلب تحاليل المناعة ويقرأ الشاهد الصاح

لو داير تشوف شكل الحلقات دي على بشرة زي بشرتنا، فتش في قوقل صور بعبارة (Subacute cutaneous lupus dark skin)، علشان تعرف كيف المرض بقلد الفطريات، ما علشان تشخص طفحك براك

وفي المرة الجاية حنشوف شاهد مختلف، وردة بنفسجية بتطلع حوالين العين، وبتكون مرات أول زول يفتح ملف أورام متدسية جوا الجسم