في أيام الشتاء الباردة، أو لمن الزول يغسل ايدينو بموية باردة شديد، بلاحظ انو أطراف أصابعو نملت، ولونها اتغير، الأصابع مرات بتبقى بيضا باهتة، وبعد شوية تقلب للون الأزرق، ولمن تدفى ترجع تحمر وتوجع شوية
الحالة دي بنسميها ظاهرة رينو (Raynaud's phenomenon)، وبتحصل لأن الأوعية الدموية الصغيرة في الأطراف بتنقبض بشدة كرد فعل للبرد أو التوتر، وبتقطع الدم مؤقتاً عن الأصابع
المشكلة انو في بشرتنا الداكنة، الشحوب واللون الأزرق ده بكون صعب يتشاف بوضوح على الجلد العادي، علشان كده، العين الخبيرة بتعاين طوالي لفراش الظفر (Nail bed) من جوا، لأنو بعكس انقطاع الدم ورجوعو بصورة أوضح بكتير من الجلد الحولو
زي ما اتعودنا، الظاهرة دي في الأغلب الأعم حميدة ومطمئنة تماماً، وبتجي لنسبة كبيرة من الناس (خصوصاً الشابات) من غير أي مرض داخلي، وبنسميها ظاهرة رينو الأولية، الزول بس بحتاج يلبس قفازات ويدفي أطرافو والموضوع بنتهي
لكن القرينة بتنقلب وتستاهل انتباه لمن الظاهرة دي تظهر فجأة عند زول كبير في العمر، أو تكون في يد واحدة أكتر من التانية، أو تترافق مع ألم في المفاصل أوالجلد البيشد الاتكلمنا عنو في البوست الفات، هنا الظاهرة بتكون شاهد على أمراض مناعية زي تصلب الجلد أو الذئبة، والطبيب بطلب تحاليل مناعية علشان يطمن على الأوعية الدموية الداخلية
لو داير تشوف التغيرات دي، فتش في قوقل صور بعبارة (Raynaud's phenomenon dark skin)، علشان تفهم كيف تقرأ فراش الظفر، ما علشان تفزع من أي برودة في ايدينك
وفي المرة الجاية حنرجع لاختبار القزازة الاتعلمناهو في الباب صفر، ونشوف بقع بتطلع في الساق وما بتختفي بالضغط