
ظهور وحمة أو بقعة ملونة في جلد المولود من الحاجات البتشغل بال الأهل طوالي وتخليهم يسألوا عن سببها، وفي الأغلبية الساحقة من الحالات، الوحمات والبقع الجلدية بتكون تغيرات موضعية بسيطة في الجلد براهو، حميدة ومطمئنة تماماً، وما وراها أي مرض داخلي يخوف
لكن في قانون القرائن الاتعلمناهو في السلسلة دي، مكان العلامة وتوزيعها بيحركوا الاحتمال وبيغيروا وزن الشهادة،و في نوع من الوحمات الوعائية اسمها الوحمة الخمرية، بتنتج من تغير في الأوعية الدموية السطحية، وفي بشرتنا الداكنة، وبسبب تداخل لون الدم جوا الأوعية مع صبغة الميلانين، الوحمة دي ما دايماً بتظهر باللون الأحمر أو الخمري الفاتح المكتوب في الكتب، بل ممكن تظهر بلون بنفسجي غامق، أو بني غامق، أو مجرد غمقان واضح ومحدد في المنطقة مع اختلاف في الملمس مع الزمن
الفرق العملي والمهم هنا بيعتمد على المكان؛ لو الوحمة الخمرية دي ظهرت في الوش وأخدت تحديداً منطقة توزيع العصب الخامس، خصوصاً الجزء الفوقاني الحوالين العين والجبهة، هنا الجلد بيكون رافع قرينة قوية لمتلازمة اسمها متلازمة ستيرج-ويبر (Sturge-Weber syndrome)
الربط بين وحمة في الوش ومشكلة في الدماغ بيرجع لنفس القاعدة التأسيسية: الجلد والجهاز العصبي كانوا طبقة واحدة في بداية تكوين الجنين، فالتغير الوعائي الظاهر في مسار العصب الخامس على الجلد ممكن يكون شاهد على تغير وعائي مشابه جوا بيأثر على الدماغ، وجود الوحمة في المكان ده ما حكم نهائي بالمرض، لكنه شاهد بيخلي الطبيب ما يقيف عند شكل الجلد، ويعمل التقييم الطبي عشان نطمن على الدماغ والأعصاب بالفحص المناسب من غير فزع ومن غير إهمال
لو داير تشوف شكلها وتوزيعها على بشرة زي بشرتنا، فتّش في قوقل صور بـ (Sturge-Weber syndrome dark skin) عشان تعرف تفرقها لمن تشوفها، ما عشان تحكم على نفسك من صورة
وفي المرة الجاية حنشوف طفح تاني بيمشي على خط العصب بالحرف، الحزام الناري، ونعرف متين بيكون عابر ومتين بيشي عن مناعة ضعيفة أو يستدعي إحالة عاجلة لو ظهر حوالين العين
