أي عبوة مكتوب عليها «تطويل وإنبات وتكثيف» لازم نسألها سؤال واحد ومباشر قبل ما ندفع فيها قروش: إنتي بتشتغلي وين بالضبط؟ فوق ساق الشعرة الميتة، ولا تحت الجلد جوه البصيلة الحية؟ الكلمتين ديل بيتباعوا في الإعلانات كأنهم حاجة واحدة، مع إن الفرق بينهم هو الفرق بين تقليل الخسارة وبين تشغيل المصنع
التطويل الظاهر قدام المراية هو نتيجة معادلة حسابية فيها طرفين: الجذر بطلع طول جديد، والطرف إما يحتفظ بيهو أو يتكسر، لو البصيلة طلعت سنتيمتر في الشهر، وأطراف شعرك اتكسرت بنفس المقدار، الطول الظاهر حيفضل ثابت وما حتحسي بفرق، ولو قللنا التكسر من غير ما نغير سرعة البصيلة، الشعر حيظهر كأنو بدأ يطول بسرعة، مع إن المصنع تحت الجلد شغال بنفس سرعتو الطبيعية القديمة
عشان كده البلسم، والليف-إن، والزيوت، والكركار، والماسكات، وواقي الحرارة، بتعتبر منتجات ممتازة «للتطويل» بالمعنى العملي؛ لأنها بتلين ساق الشعرة، وبتقلل الاحتكاك، وبتحمي الأطراف، فبتخليك تحتفظي بكل مليمتر بطلع من الجذر، الزولة البتستعمل كريم وتلقى شعرها طال ما متوهمة، المنتج نفعها فعلاً في حماية الساق، المشكلة بتحصل لما إعلان الشركة ينقل الفائدة دي من مكانها ويقول إن الكريم «نشّط الدورة الدموية وأيقظ البصيلات وضاعف سرعة النمو»، هنا الإعلان قفز من حماية فيزيائية لساق ميتة، لادعاء طبي في بصيلة حية محتاج دليل علمي مختلف تماماً
علاج الإنبات الحقيقي لازم يوصل للبصيلة تحت الجلد أو يغير في دورة نموها الهرمونية والبيولوجية، وده ما بحصل لمجرد إننا دهنا منتج على الفروة؛ لأن جلد الفروة حاجز قوي، والبصيلة عضو حي عندو إشارات ودورة نمو معقدة، المنتج العلاجي محتاج مادة فعالة بتركيز مدروس، وقدرة حقيقية على الاختراق، ودراسات سريرية بتقيس تعداد الشعر وسُمكه على مدى شهور، موش صور «قبل وبعد» بإضاءة وزاوية تصوير مختلفة
التطويل والإنبات ما خصمين، الشعر محتاج الاتنين في مكانهم الصحيح: بصيلة سليمة تطلع شعرة قوية، وروتين لطيف يحرسها من التكسر لحدي ما تصل للطول الدايراهو، لما نخلط بينهم، الكريم بياخد فضل تنشيط البصيلة، والإعلان ببيع لينا حماية الأطراف بسعر معجزة طبية بتاعت انبات
في المنشورات الجاية من القسم ده، حندخل المعمل ونفكك أدوات الإنبات والتطويل وحدة وحدة تحت المجهر:
- حنبدأ بسيرومات الفروة الحديثة؛ حنفرز المادة الوحيدة المعتمدة رسمياً من الغذاء والدواء (FDA) ونقارنها بالأسماء المشهورة زي الريدينسيل، البروكابيل، والكافيين، ونشوف هل العلم وراها بحجم التسويق؟
- حنقيف مع زيت الروزماري (إكليل الجبل) ونراجع دليلو السريري المشهور: هل فعلاً بقارع الأدوية ولا الحكاية أمل محتاج تروي؟
- حنفرز الوصفات الشعبية المشهورة في بيوتنا: الخروع، الجرجير، البصل، الثوم، القرنفل، والمحلب، ونعرف القادر عليهو شنو والممكن يسبب حكة والتهاب
- حنشرح مقشرات الفروة الفيزيائية والكيميائية؛ متين تكون سر النظافة وتهيئة الفروة للعلاج، ومتين تقلب بضرر على الشعر المجعد
- وحنختم القسم بالأسباب الطبية والأمراض العميقة البتوقف نمو الشعر من جوه، وكيف نقرأ علاماتها المخفية قبل ما نضيع الزمن في تبديل الشامبوهات والكريمات
#حكاية_الشعر
#عيادات_بيت_العافية
#عيادة_الجلدية_أون_لاين