لفّي علبة الكارووايت وأقري الكلام المكتوب في ضهرها، الشركة بتقول انو الكريم غني بالبيتا كاروتين (beta-carotene) وفيتامين أ وفيتامين هـ، وانو المكونات دي بتخلي البشرة فاتحة، طرية، وناعمة زي الساتان
لكن ولا واحد من المكونات دي بفتّح البشرة، البيتا كاروتين صبغة، هي نفسها البتدي الجزرة لونها البرتقالي، ولو اتمسحت على الجلد بتسيب فيهو مسحة صفرا برتقالية، والبشرة ما بتفتح منها ولا درجة
إذن لو كريم مكتوب عليهو جزرة وفيتامينات، والبشرة فتحت معاهو بشكل واضح في أسابيع قليلة، يبقى السؤال المفيد: الشغّال جوا العلبة ده منو؟
الإجابة اتناقلت بين النسوان في السودان سنين، همس في الصالونات وتجارب في القروبات، والجديد اسي انو العلبة نزلت من الوش للشعر، بقوا بمسحوها عشان تفرد الشعر، تقلل الهيشان، وترجّع الجوانب ومقدمة الشعر البقت خفيفة
أمس نشرت بوست لباحثة في التراكيب التجميلية، البوست نبّه بشكل صحيح لوجود الكلوبيتازول بروبيونات (clobetasol propionate) في نسخ من الكريم ده، وهو من أقوى أنواع الكورتيزون الموضعي في الطب، التنبيه كان في محلو، لكن الردود عليهو وضّحت انو الناس محتاجة الصورة كاملة
المعامل لقت شنو لمن حللت الكريمات دي؟ الكمية دي بتعني شنو بالحساب؟ فروة الراس بتتعامل معاها كيف؟ الشعر والجلد بحصل ليهم شنو؟ الجسم من جوا بدفع شنو؟ والسودان وين من كل ده؟