دي قوة الكلوبيتازول في كريم كارووايت اتحلل في بريطانيا سنة 2023، مقارنة بقوة الديرموفيت (Dermovate)، اللي هو أقوى كريم كورتيزون في الجلدية، والصيدلية ما بتصرفو إلا بروشتة (المفروض)
الجهة الرقابية البريطانية حللت كريم كارووايت من إنتاج شركة في أبيدجان، ساحل العاج، لقت فيهو 422 مليجرام كلوبيتازول في الكيلو، يعني 0.042%، والديرموفيت نفسو تركيزو 0.05%، يعني الزولة البتمسح «كريم جمال» كانت عملياً بتمسح دواء بروشتة بقوة قريبة من الأصلي، وهي ما عارفة
والنقطة الأهم في التقرير كلو انو الجهة الرقابية صنّفت المنتج ده «غير مقلّد»، يعني الكورتيزون لقوهو في منتج اعتبروهو أصلي، موش في علبة مضروبة من سوق شعبي، وكمان أنبوبة الكريم نفسها كان فيها الهيدروكينون (hydroquinone)، مادة التفتيح المعروفة، والكرتونة البرّه ما جابت سيرتو
الكاروتون نفس القصة، في فبراير 2025 اتحلل كريم كاروتون «Clarifying Cream» جاي من غانا، لقوا فيهو هيدروكينون 3.7% زائد كلوبيتازول، والشحنة اترفضت في الحدود البريطانية واتدمرت، وقبلها بحوالي سنة، طلع كريم كاروتون تاني «Light & Natural» فيهو كلوبيتازول وهيدروكينون اتنين فاصلة تسعة بالمية 2.9%،
وفي كندا برضو، الهيدروكينون اتلقى فيها فوق اتنين بالمية 2% يعني دواء بروشتة، والكلوبيتازول في أصلو دواء بروشتة، يعني العلبة البرتقالية الواحدة ممكن تكون شايلة دواءين بروشتة، والاتنين ما ظاهرين في مكونات العلبة