"يا دكتور ده أكيد من الزعل، والله جاني المرض ده بعد الحرب"
الجملة دي بتتردد كتير في العيادات، وكثير مننا بيربطوا بداية مرضهم بصدمة نفسية أو فترة ضغوط شديدة، ونحنا كسودانيين حياتنا مليانة "شد وجذب"، من هموم المعيشة والنزوح، لحدي ضغوط الشغل والالتزامات الاجتماعية الما بتخلص، وبنتعامل مع التوتر ده كأنه "حالة نفسية" بس، لكن الحقيقة المرة إن "الهم" ده بيتحول لـ "سم" كيميائي بيمشي في عروقنا وبيكسر مناعتنا حتة حتة.
عشان نفهم الحاصل، لازم نقارن بين "خوفة" أجدادنا و"خوفنا" نحنا، زمان الإنسان كان بيخاف من حاجات محسوسة ومؤقتة، زي أسد هاجم عليه أو فيضان، فكان الجسم بيفرز هرمون الكورتيزول عشان يدي طاقة للهروب أو المواجهة، وبمجرد ما الخطر يزول، الكورتيزول بينزل والجسم بيرتاح. لكن مشكلتنا الليلة إننا عايشين في حالة "استنفار دائم"، الخوف ما من أسد، الخوف من "بكرة"، من الإيجار، من المستقبل، وده بيخلي الكورتيزول عالي في دمنا 24 ساعة بدون توقف.
وهنا بتحصل الكارثة الكبيرة اللي العلماء سموها "مقاومة الكورتيزول"، الكورتيزول ده في الوضع الطبيعي هو "طفاية الحريق" اللي بتطفي الالتهاب، لكن لما يفضل عالي ومستمر لفترات طويلة، الخلايا المناعية بتبطل تستجيب ليه، زي الزول لما يسمع جرس الإنذار ضارب طوالي بيتعود عليه وما بيتحرك. النتيجة إن "الفرامل" حقت الجهاز المناعي بتتعطل، والالتهاب بيفلت من السيطرة ويبدأ يهاجم الجسم بدون أي رادع، يعني التوتر المزمن بيخلي جسمك يفقد السيطرة على "عساكره".
الموضوع ما بقيف هنا، التوتر ده بيمشي يضرب بطننا كمان، في خلايا اسمها "الخلايا الصارية" (Mast Cells) قاعدة في الأمعاء، الخلايا دي حساسة جداً لهرمونات التوتر، ومجرد ما نشيل هم، هي بتنفجر وبتطلع مواد بتدمر "الغراء" الماسك جدار الأمعاء. يعني "الزعل" حرفياً بيفتح ثغرات في أمعائنا (Leaky Gut) وبيخلي السموم تدخل الدم ، وعشان كدة كتير من الناس لما يزعلوا بطنهم "بتفك" أو بتتهيج عليهم، وده بيثبت إن الحالة النفسية ومناعة الجسم والأمعاء كلهم شبكة واحدة لو اتهزت واحدة الباقي كله بيقع.
عشان كدة، لما نقول ليك "روق المنقة" وما تشيل هم، دي ما نصيحة اجتماعية، دي نصيحة طبية، لأن الهدوء النفسي جزء أساسي من خطة العلاج والوقاية، ومحاولة السيطرة على التوتر هي محاولة للسيطرة على جيش متمرد جوة جسمك.
بعد ما عرفنا أثر الزعل، فضل لينا سؤال محير جداً: ليه الأمراض دي بتختار "النساء" أكتر من الرجال؟
هل هي صدفة ولا في سر قديم؟
البوست القادم : ضريبة الأمومة.. ليه المناعة بتستهدف النساء؟
#عيادات_بيت_العافية #عيادة_الجلدية_أون_لاين #المناعة_الذاتية
الفهرس
https://www.facebook.com/share/p/17cXVNnMF5/