"يا دكتور، أنا ضغطي ما عالي، ليه أخفف الملح؟"
ده الرد البسمعه طوالي لما أقول لمريض عندو مشكلة مناعية (صدفية، بهاق، روماتيزم) خفف الملح. نحنا في السودان علاقتنا بالملح "حميمة" زيادة عن اللزوم. من "المش" الحار، للجبنة القديمة، للتسالي، لحدي أكياس الشيبس البياكلوها شفعنا كل يوم. الليلة حنكشف ليكم الوجه التاني للملح، وكيف إنو هو و "قلة الألياف" بيعملوا تحالف شيطاني ضد جهازك المناعي.
الملح.. الزناد الخفي
الموضوع ما عنده علاقة بضغط الدم بس. الأبحاث الجديدة اكتشفت حاجة مخيفة: الملح الكتير بيدخل جوة الخلايا المناعية وبيغير "برمجتها" تماماً. في "مفتاح" جوة خلايا المناعة اسمه (SGK1). لما ناكل ملح كتير، المفتاح ده بيشتغل.
ولما يشتغل، بيمنع تكوين "خلايا السلام" (Tregs) اللي بتهدي اللعب، وبدل كدة بيحول الخلايا لنوع تاني شرس جداً اسمه (Th17). الخلايا الشرسة دي هي المتهم الأول في أمراض زي التصلب اللويحي والصدفية. ببساطة: الملح الكتير بيقلب "عسكري المرور" المحترم، وبيحوله لـ "بلطجي" بيكسر في الجسم.
تجويع "الضيوف" (البكتيريا النافعة)
المصيبة التانية في أكلنا الحديث هي "قلة الألياف". زمان كنا بناكل "العيش البلدي" (الخميرة) والخضار والويكة، ودي كلها ألياف. الألياف دي ما عشان الهضم وبس، دي عبارة عن "حق الضيافة" للبكتيريا النافعة العايشة في بطننا.
البكتيريا دي لما تاكل ألياف، بتنتج مواد سحرية اسمها (أحماض دهنية قصيرة) زي مادة اسمها "بيوتيرات" (Butyrate). المادة دي هي "مهدئ الأعصاب" الطبيعي للجهاز المناعي. هي البتقول للمناعة: "روقي، مافي داعي للهيجان".
المعادلة الكارثية
نحنا الليلة بنعمل العكس تماماً: بناكل ملح ومواد حافظة كتير (فبنشغل "مفتاح الشراسة" في المناعة). ما بناكل ألياف وخضار كفاية (فبنجوع البكتيريا النافعة وبنحرم جسمنا من "المهدئات الطبيعية"). وحتى الملح الزايد ذاته بيقتل البكتيريا النافعة (زي بكتيريا Lactobacillus).
عشان كدة الحل بيبدأ من "المطبخ"، وتقليل الملح ما مسألة رفاهية أو عشان الضغط بس، دي خطوة أساسية عشان ترجع "تبرمج" جهازك المناعي على الهدوء. حاول استطعم الأكل بنكهته الطبيعية، اعتمد على الليمون والبهارات والشطة الخضراء بدائل للنكهة، ورجع "السلطة" و"الخضار" و"العيش الأسمر" لمائدتك لأنها بتغذي البكتيريا النافعة وبترجع التوازن المفقود، وخلي الملح للضرورة القصوى بس
بس يؤسفني أقول ليكم دي ما الحاجه الوحيدة المحببة اللي مضطرين مخليها لو عاوزين ننظم جهازنا المناعي، وده الحنتكلم عنو في البوست الجاي عن السكر والحلويات
#عيادات_بيت_العافية #عيادة_الجلدية_أون_لاين #المناعة_الذاتية
الفهرس
https://www.facebook.com/share/p/17cXVNnMF5/