دليلك عشان تعرف نوع بشرتك براك
عشان تختار الكريم الصاح وتعرف يا ياتو "تحيز" بيناسبك من اللي شرحناهم المرة الفاتت، ما محتاج تمشي لعيادة وتدفع قروش كتيرة في أجهزة فحص معقدة، لأن العلماء والدكاترة اتفقوا على طريقة منزلية بسيطة جداً ودقيقة اسمها "الغسل والانتظار" (Wash and Wait)، الفكرة كلها إنك تدي جلدك فرصة يتكلم ويعبر عن طبيعته الحقيقية من غير أي مؤثرات خارجية.
الموضوع بيبدأ بإنك تغسل وشك بصابون لطيف ومتوازن، وبعدها تجففه بالراحة "طبطبة" من غير فرك، وهنا بتجي أهم خطوة وهي إنك تقعد تقريبا ساعة كاملة ( من ٣٠ لـ ٦٠ دقيقة بالتحديد ) من غير ما تخت أي حاجة في وشك، لا كريم ولا تونر ولا حتى ترش موية. في الفترة دي، الغدد الدهنية حتشتغل بطبيعتها والموية حتتبخر بمعدلها الطبيعي، وبعد الساعة ما تخلص، قوم اقيف قدام المراية وشوف النتيجة.
لو حسيت إن وشك "مشدود" وكأنه ضيق عليك لمن تبتسم، أو شفت قشور بيضاء صغيرة، فده دليل قاطع على إن حاجزك الجلدي بيفقد الموية بسرعة وإن معدل التبخر عالي، ودي هي "البشرة الجافة" اللي بتحتاج كريمات تقيلة فيها دهون ومواد قافلة (Occlusives + Emollients) عشان تعوض النقص.
أما لو لقيت وشك "بيلمع" والزيت ظاهر في كل مكان ( الجبهة والأنف والخدود ) فدي معناها "بشرة دهنية"، ودي ما بتحتاج دهون زيادة، بل بتحتاج مرطبات مائية خفيفة زي الجل (Humectants) عشان ترطب من غير ما تكتم المسام. ولو كانت اللمعة محصورة بس في منطقة الجبهة والأنف (اللي بنسميها منطقة الـ T-Zone) لكن خدودك ناشفة أو عادية، فإنت هنا صاحب "بشرة مختلطة"، وده النوع الأكثر شيوعاً.
وعشان تفرق بين إن جلدك ناشف من بره ولا جسمك كلو عطشان من جوه، ممكن تعمل اختبار بسيط اسمه "اختبار القرصة" (Pinch Test)؛ جرب أقرص الجلد في ظهر يدك قرصة خفيفة وفكها، لو الجلد رجع مكانه فوراً زي الأستيك فده مؤشر ممتاز، لكن لو أخد ثواني ورجع ببطء زي الخيمة المنصوبة (Tenting)، فده جرس إنذار بإن عندك جفاف عميق في الأدمة ونقص سوائل حقيقي، وده حله إنك تشرب موية كتير وتستعمل مرطبات فيها "شفاطات موية" قوية (Humectants) تسحب الرطوبة للعمق.
الخلاصة يا جماعة، عشان تختار الكريم الصاح وتوفر قروشك، لازم "تسمع كلام وشك" وتشوف هو طالب شنو بعد الغسيل بساعة، لأنه هو الوحيد اللي حيديك الوصفة الحقيقية لاحتياجاته. ومن ثم حتعرف تختار ليهو شنو
بالمنشور الجاي حنعرف العوامل البتحكم اختيارك للتحيز المناسب بالمرطب حسب نظام باومان
#عيادة_الجلدية_أون_لاين
#عيادات_بيت_العافية
#أسرار_الترطيب