كيف تقرأ الكريم قبل ما تشتريه؟
مشكلة أغلبنا إننا بنشتري الكريم عشان "ريحته حلوة" أو عشان "فلان شكره لي"، وبننسى أهم حاجة: هوية الكريم ده شنو؟
زي ما قلنا بالبوست الفات، أي مرطب هو "خلطة" من العائلات التلاتة (شفاطة، قافلة، منعمة). لكن السر إن الخلطة دي عمرها ما بتكون متساوية؛ دايماً في "عائلة واحدة" هي المسيطرة، بالإضافة طبعا لدور بقية المكونات في تحديد "هوية" ووظيفة الكريم، وهي اللي بتحدد الكريم ده ينفع ليك ولا لا. دي بنسميها "التحيّز" (Bias).
عشان نفهم الكلام ده بمثال عملي، تعالوا نمسك أشهر علبة في بيوتنا كلنا
كريم جليسوليد (العلبة الحمراء)، ونحلله زي الدكاترة:
١. اقرأ المكونات (The Ingredients): لما تقلب العلبة، حتلقى أول وأهم مكون مكتوب هو "Glycerin". المفاجأة إن الجلسرين في جليسوليد بيمثل ٥٠٪ من حجم العلبة!. ودي نسبة ضخمة جداً ونادرة في الكريمات العادية.
٢. حدد التحيّز (The Bias): بما إن نص العلبة جلسرين (شفاط موية)، معناها الكريم ده هويته واضحة: "شفاط موية من العيار الثقيل" (Hyper-Humectant).
٣. متين ينفع ومتين يورّطك؟ (The Context): هنا بيجي الفهم:
• في المكيفات والشتاء (ينفع جدًا): المكيفات بتشتغل كـ "أجهزة تجفيف" (Dehumidifiers) بتسحب الرطوبة من الجو وتخليها أقل من ٣٠٪. هنا جلدك بيبدأ ينشف شديد، فبتحتاج "شفاط" قوي زي جليسوليد يسحب الموية بقوة ويمسكها في الجلد. بشرط انك ما تنسى تشرب موية كويس عشان تديهو حاجه يشفطها.
• في السخانة والشارع (ورطة): بسبب كمية الجلسرين العالية وقوامه التقيل (بوجود مادة السيليكا)، الكريم ده بيكون "دبق" ولزج جداً. لو طلعت بيه في شمس الخرطوم، حتحس إنك ملبق ومخنوق، لأنه تقيل زيادة على المسام مع العرق.
عشان كده مافي حاجة اسمها "كريم كعب"، في حاجة اسمها "اختيار غلط". فقبال ما تشتري، اقلب العلبة واعرف مكوناتها
لكن عشان ما تحتار وتروح ففي البوست الجاي: حنتعلم كيف تعمل "اختبار منزلي" بسيط لجلدك، عشان تعرف ياتو "تحيز" في الكريم المعين هو المناسب ليك بالضبط. ولاحقا نفصل التحيزات بتاعت الأنواع المشهورة والمعروفة بالسوق
#عيادة_الجلدية_أون_لاين
#عيادات_بيت_العافية
#أسرار_الترطيب
تلغرام العيادة
t.me/Byt_Alafya