الترطيب المسموم
لما نخلط "السم" مع "العسل" ونسميه نضارة
القصة هنا هي انتشار كريمات السوق زي "سيفيك" (Civic) وغيرها من المنتجات اللي بتحتوي على مادة اسمها "كلوبيتاسول بروبيونات" (Clobetasol Propionate) بتركيز عالي، المادة دي علمياً هي "ستيرويد" (كورتيزون) قوي جداً، مصمم في الأساس لعلاج التهابات وأمراض جلدية محددة ولفترات قصيرة جداً، لكن لما نستخدمها نحنا كـ "دهان يومي" أو نخلطها مع الكريمات، هي بتخدعنا لأنها بتعمل انقباض في الأوعية الدموية وبتوقف إنتاج الصبغة فجأة، فالزول بيحس إنه "نور" في أيام بسيطة.
لكن تحت "البياض" ده، في جريمة بتحصل في حق الجلد؛ لأن الكورتيزون القوي ده بيعمل حاجة اسمها "ضمور البشرة" (Epidermal Atrophy)، يعني حرفياً بيوقف الخلايا (الطوب) عن إنها تتكاثر وتجدد نفسها، وبيمنع تصنيع الكولاجين اللي بيدي الجلد قوته، فالنتيجة الحتمية هي إن الجلد بيبقى رقيق جداً وهش زي الورقة لدرجة إن العروق بتبدأ تظهر تحته.
والأخطر من كدا، إن المواد دي بتدمر "المونة الدهنية" (Lipid Barrier) اللي بتحبس الموية، فبيحصل انهيار كامل في الحاجز الجلدي، والموية بتبدأ تتبخر من جسمك بكميات مخيفة (Increased TEWL)، وعشان كدا المدمنين على الخلطات دي بيدخلوا في "دوامة التبعية" (Dependency Loop)؛ الجلد ينشف ويلتهب بسبب الكورتيزون، فيقوموا يختوا كريم زيادة عشان يهدوه، فيزيدوا الدمار والترقيق، لحدي ما الجلد يفقد قدرته الدفاعية تماماً وتظهر التشققات والخطوط الدائمة.
ونفس الخطر بينطبق على مادة "الهيدروكينون" (Hydroquinone) الموجودة في كريمات التفتيح الرخيصة، اللي الاستخدام العشوائي ليها لفترات طويلة ممكن يؤدي لنتيجة عكسية تماماً وتصبغات زرقاء-سوداء عميقة في الجلد (Exogenous Ochronosis) وتدمير لتماسك الطبقة القرنية.
الرسالة اللي لازم توصل لكل بيت، التفتيح الحقيقي والنضارة مستحيل يجوا بتدمير "الحيطة" وتكسير "المونة"، التفتيح الطبي الآمن بيجي بس لما يكون الحاجز الجلدي سليم ومتروي، فما تخلطوا "السم" مع اللوشنات وتفتكروا إنه دواء، لأن تمن "الترطيب المسموم" ده هو جلد مشوه وفاقد للحياة صعب جداً يرجع زي الأول.
#عيادات_بيت_العافية
#عيادة_الجلدية_أون_لاين