أي روتين عناية ناجح ببدأ من العادات الصحية
بعد ما لفينا لفة طويلة في عالم الكريمات والواقيات وتأثير الجو، لازم نختم سلسلتنا دي بالرجوع لـ "الماكينة الداخلية" المحركة لكل شيء، وهي صحتنا العامة ونمط حياتنا، لأنو الجلد في النهاية ما هو إلا مرآة بتعكس التفاعلات الكيميائية الحاصلة جوة أجسامنا.
لو بدأنا بموضوع الأكل، فالعلم والبيانات الإحصائية بتأكد لينا وجود علاقة وطيدة بين السكريات والدقيق الأبيض (يعني الحاجات اللي عندها High Glycemic Index) وبين نشاط الغدد الدهنية
فكل ما نكثر من السكريات، جسمنا بيفرز هرمون الإنسولين وعامل النمو (IGF-1)، وديل بيعملوا زي "زر التشغيل" لمسار بيولوجي معقد بنسميه (mTORC1) اللي بحفز الغدد في منطقة الـ T-zone بالذات لإنتاج كميات أكبر من الزيوت، وبكدة بنكون "بنغذي" الحبوب واللمعان المزعج من غير ما نحس، وعشان كدة الاعتدال في الأكل هو أول خطوة لتهدئة البشرة المختلطة من الداخل.
أما موضوع النوم والتوتر، فدي قصة بطلها هرمون "الكورتيزول"؛ لما نساهر أو نعيش في ضغط عصبي مستمر، الجسم بفرز الكورتيزول اللي عنده القدرة إنو يخلي الغدد الدهنية في حالة "هيجان"، فبتلقى وشك في الصباح "مزيت" في مناطق الأنف والجبهة، وفي نفس الوقت فاقد للنضارة وباهت في المناطق الجافة
برضو لأنو السهر بيحرم الجلد من فترة الترميم الطبيعي اللي بيجدد فيها "الحواجز الدهنية" الصحية في الخدود، فبنطلع بنتيجة مشوهة: زيت زايد في مكان، وجفاف والتهاب في مكان تاني، وكأنو الماكينة الداخلية فقدت البوصلة تماماً.
وبالنسبة للرياضة، فهي سلاح ذو حدين للبشرة المختلطة ولازم نتعامل معاها بذكاء؛ فمن ناحية، الجري والنشاط البدني بحسن الدورة الدموية وبخلي الأكسجين يصل لخلايا الجلد في الخدود والفكين ويحييها
لكن من الناحية التانية، العرق لما يمتزج مع الزيوت الطبيعية في المسام الواسعة في منطقة الـ T-zone وما يتنضف بسرعة، بتحول لبيئة مثالية لنمو البكتيريا وانسداد المسام. عشان كدة، القاعدة الطبية بتقول إنو الرياضة ضرورية جداً لنضارة البشرة، بشرط إننا نغسل وشنا بمنظف لطيف فوراً بعد التمرين عشان ما ندي فرصة لـ "كتمة" المسام إنها تحصل.
في الختام، البشرة المختلطة ما عدو محتاج محاربة، هي بس نظام معقد ومحتاج "إدارة" حكيمة بتوازن بين العناية الخارجية ونمط الحياة المتوازن، وبكدة بنصل لأفضل نسخة من صحتنا وجمالنا.
سعدت جداً بمتابعتكم للسلسلة دي، وأتمنى تكون وضحت ليكم الجوانب العلمية ببساطة، وشجعتكم تحاولوا الفهم من منظور طبي وعلمي قبال السعي للحلول (المجربة) والسهله والغلط!
#عيادات_بيت_العافية
#عيادة_الجلدية_أون_لاين