ما طريقة واحدة بل تكيف بذكاء
السؤال الصعب البواجهني يوميا كطبيب جلدية هو السعي لأفضل منتج، لأنو ببساطة روتين البشرة ما "وصفة ثابتة" بنشيلها معانا وين ما نمشي، بل هو معادلة متغيرة جداً بتعتمد على "الموقع" والبيئة المحيطة بينا.
فلو إنت في السودان، التحدي الأكبر هو "السموم" والحرارة الجافة ومعاها "العجاج" أو الغبار البيملأ الجو؛ هنا البشرة المختلطة بتدخل في أزمة حقيقية، لأنو الغبار بيمتزج مع الزيوت في الـ T-zone وبتشتغل كسدادات للمسام وتنتهي برؤوس سوداء وحبوب زي الحمو
وفي نفس الوقت الهواء الجاف بيمص أي رطوبة من الخدود ويخليها تبدو باهتة ومقشرة. في اازي ده بنفع "التنظيف المزدوج" في المساء عشان نضمن إنو ذرات الغبار المجهرية طلعت من المسام الواسعة، مع استخدام مرطبات قوامها مائي تماماً عشان ما تلم الغبار في وشنا زيادة.
أما لو انتقلنا لبيئة الخليج، فالمعادلة بتنقلب تماماً بسبب "الرطوبة العالية" الخانقة والاعتماد الكلي على "المكيفات". الرطوبة البرة بتخلي الغدد الدهنية في حالة فوران وكأنو وشك "غرقان" زيت، لكن بمجرد ما تدخل المكتب أو البيت، المكيف بشتغل كجهاز سحب رطوبة (Dehumidifier) جبار، فبيسحب جزيئات الموية من المناطق الضعيفة في وشك (الخدود) ويخليها جافة ومشدودة رغم إنو ملمسها بظل كأنو زيتي.
هنا الذكاء بتلخص في استخدام سيرومات زي "الهيالورونيك" اللي بتقدر تسحب الرطوبة من الجو الرطب البرة وتثبتها جوة الجلد، مع ضرورة تقوية حاجز البشرة بمرطبات فيها "سيراميد" عشان تقاوم جفاف المكيفات القسري، وتمنع "التبخر العكسي" للموية من الخدود.
ولما نمشي لبيئة زي مصر، بنلقى نفسنا قدام تحدي "التقلبات الموسمية" الواضحة؛ فصيف القاهرة الرطب بيحتاج روتين خفيف جداً يشبه روتين الخليج، لكن الشتاء والبرد بفرضوا علينا "مناورة" تانية خالص. في الشتاء، نشاط الغدد الدهنية بقل طبيعياً بسبب انخفاض الحرارة، والمناطق الجافة بتزيد مساحتها، فممكن نلقى نفسنا محتاجين نحول لغسولات كريمية (Creamy Cleansers) ونزيد من كثافة المرطب في منطقة الـ U-zone، ونخفف من مقشرات الدهون القوية اللي كنا بنستخدمها في الصيف.
الفكرة بإختصار هي إنو بشرتنا دي كائن حي بتفاعل مع الضغط الجوي والرطوبة والحرارة، وعشان كدة لازم تكون عينك "تحليلية" وتعرف متين تزيد الجرعة ومتين تخففها حسب الجو اللي إنت فيهو، لأنو الجمود في الروتين هو اللي بيخلي البشرة المختلطة تفقد توازنها وتدخل في مشاكل الالتهابات المزمنة.
في المنشور الجاي والأخير، حنطلع من برة الوش وندخل لـ "الماكينة الداخلية"؛ حنشوف كيف الأكل، والنوم، والرياضة بيتحكموا في جودة الدهون اللي بتفرزها بشرتنا، وكيف بنقدر نعدل نمط حياتنا عشان نصل لأفضل نسخة من بشرتنا المختلطة
#عيادات_بيت_العافية
#عيادة_الجلدية_أون_لاين