التوعية الطبية بالسوشال ميديا مسؤولية، ما ممكن تكون مجرد دعاية أو سعي للإنتشار أو إرضاء للمتابعين، لأن الامر هنا متعلق بأغلى ما نملك: صحتنا
بتلاقيني كتير توقعات وطلبات بأنو أوري العلاج مباشرة شنو، وكتبت كتير عن أن الطب ما (كتاب مرض = كتاب دوا)، وأن الطبيب ما مهتمو يكون مصدر للمعلومة حول العلاج، بل تقييم دقيق للتشخيص وحالتك المرضية المحددة، وعلى أساسها بجي الاختيار المناسب للعلاج
ناخد أمثلة واقعية توضح الفكرة:
عيان كان عندو إكزيما رجع لي بعد سنة؛ وللأسف كان خلالها كل ما تجيهو بمشي يصرف نفس العلاج (كورتيزول قوي كان مناسب بحالتو الأولى)، وطبعا المرة دي جاني بمشكلة أكبر هي الاعراض الجانبية للعلاج، الخلتنا نتجاهل معاناة الاكزيما ونعالج الضرر الجلدي الاتسبب بيهو لروحو
مريض تاني كل ما تجيهو الاكزيما بمشي يستعمل كوزتيزول خفيف (لانو واعي بمخاطر القوي)، لكن برضو للأسف المرة دي كانت فطريات وانتشرت بسبب العلاج واضطرينا ناخد حبوب فطريات وعلاج طويل عشان نعكس الضرر، ده برضو حيحصل لما ما تعرف ان الفقاعات الصغيرة البتجي عادي مع الاكزيما الحادة ممكن تكون علامة التهاب فيروسي حيزيد ليك مع أي كورتيزول، وما حتقدر تميز الفرق براك لانك ما عندك الخبرة اللازمة
ممكن اواصل بأمثلة كثيرة، لكن العبرة هنا هي أن وصف علاج من تشخيص ذاتي أو بدون تمحيص كويس للحالة هي جريمة مكتملة الأركان، ايوه ممكن كتار ما يحصل ليهم حاجه، لكن لما تنشر ان علاج الاكزيما هو المرهم الفلاني فقطعا بين العشرات اللي حيعملوهو حيكون بينهم كمية معتبرة حيتضرروا؛ والقاعدة الذهبية بالطب: أولا لا تتسبب بالضرر
ده ناهيك عن أن (العلاج) ما هو أساس المعالجة؛ بل فهم المرض، ومحاولة تحييد العوامل الخاصة بكل حالة، وعمل خطة وقائية جيدة حسب نوع جلدك ومناخك وعاداتك والنقص الغذائي والامراض المزمنة المصاحبة وغيرها كتير
في كتاباتي هنا ما حأرضخ للترندات حول تحويل المحتوى الطبي لتدريب على ممارسة الطب، وحأتمسك بقناعتي أن الأهم هو انك تفهم المرض والحالات البتشبهو، وأديك طرق الوقاية الصحيحة، والتقنيات غير الضارة، عشان تفهم العلاج اصلا بشتغل كيف وتتوقع شنو لمسار المرض، وتدرك خياراتك المتاحة، اللي لازم يقدر ليك طبيب خبير شنو الأنسب ليك منها
ودمتم بصحة وعافية
#عيادات_بيت_العافية
#عيادة_الجلدية_أون_لاين