المشكلة ما بتقف في الحيطة بس زي ما شرحنا بالمنشور الفات، وإنما بتمتد لإنو الجهاز المناعي نفسو في الأكزيما بتعامل مع الموقف وكأنو في حالة طوارئ مستمرة.
لما المهيجات تخش الجلد، خلايا الجلد المتضررة بتقوم ترسل إشارات استغاثة زي صافرات الشرطة، كأنها بتقول: “في اختراق! تعالوا ألحقونا!” الإشارات دي بتصحي فرق الدفاع في المناعة، وبدل ما يجوا بهدوء ويقفلوا الفتحة ويرجعوا، بتحصل حاجة شبيهة بـ”سوء تقدير”: الاستجابة بتزيد أكتر من اللازم، وتبدأ سلسلة رسائل متتابعة جوة الجلد
كل رسالة بتولع البعدها، العلماء بيسموها “سلسلة الالتهاب” أو “شلال الالتهاب” (cascade)، لكن تخيلها ببساطة كأنو في قروب واتساب للطوارئ: رسالة استغاثة من خلية، بتفتح سيل رسائل وردود وتحشيد، وفي النهاية الحوش كلّو يبقى واقف على رجل واحدة.
المشكلة الأكبر إنو الرسائل الالتهابية دي انها بتشتغل ضدك في اتجاهين مؤلمين: أول اتجاه إنها بتضعّف الحيطة أكتر، وتدخلك في الدوامة المشهورة بتاعت الأكزيما: التهاب يعمل ضعف في الحاجز، وضعف الحاجز يعمل دخول مهيجات أكتر، ودخول المهيجات يعمل التهاب أكتر وهلم جرا
والاتجاه التاني هو الحكة فالجهاز المناعي برسل نوع من الرسائل بتخاطب أعصاب الإحساس مباشرة، فتلقى الإحساس بالحكة ما طبيعي، وما متناسب مع شكل الجلد، وممكن يكون أقوى من أي منطق. ودي بالضبط اللحظة البتبدأ فيها حلقة “الحكة-الخدش”: تحك، الجلد يتجرح، الإشارات تزيد، الالتهاب يزيد، الحكة تزيد،وتصحى تاني يوم تلقى المكان بقى أسوأ رغم إنك كنت بتحاول ترتاح.
ومع الزمن، الجلد ذاتو بتغير، يبدأ يتخن، كأنو بحاول يعمل “درع سميك” من كتر الضربات المتكررة، فتطلع الصورة المعروفة للتحزز: جلد خشن، غامق شوية، وخطوطه واضحة، لأنو الالتهاب المزمن غيّر من طريقة بناء الطبقات.
والحتة المهمة جداً هنا: ما كل الأكزيما بتشتغل بنفس السيناريو المناعي. في نوع بيكون طابعو أقرب للحساسية، ونوع تاني أقرب لاستجابة متأخرة لمادة معينة، ونوع بتكون فيه خمائر الجلد الطبيعية جزء مهم من القصة.
عشان كده نفس العلاج “السحري” الممكن يجيب نتيجة مذهلة لزول، ما شرط يجيب نفس النتيجة لزول تاني، لأنو المشكلة المناعية ما واحدة، فهمنا للآليات دي هو البخلي التعامل مع الأكزيما مخصوص بكل حالة براها.
#عيادات_بيت_العافية
#عيادة_الجلدية_أون_لاين
واتس اب الحجز تحت صورة المنشور