الليلة حنتكلم عن واحد من أشهر "المقلدين" اللي بيعملوا بقاقات في الجلد، والناس طوالي بتجري تفتش ليها كريمات حساسية بالغلط، وهو في الحقيقة ناتج عن غزو بكتيري شرس.
القصة بتبدأ مع نوع من البكتيريا اسمها "المكورات العنقودية" (Staph aureus)، البكتيريا دي ما بتكتفي بس إنها تقعد على سطح الجلد، بل بتفرز "سلاح كيميائي" فتاك عبارة عن سموم بتشتغل زي المقصات الدقيقة جداً. المقصات دي متخصصة في قطع بروتين معين اسمه (Desmoglein 1)، وهو الغراء الأساسي اللي بيلحم خلايا الطبقة الفوق من جلدنا. لما المقصات البكتيرية دي تبدأ شغلها وتقطع الغراء ده، الجلد طوالي "بيفك" من بعضه في الطابق العلوي، وبتبدأ تتكون بقاقة رقيقة جداً ومليانة سوائل.
الحالة دي بنسميها "القوباء البقاقية" (Bullous Impetigo)، وبنشوفها كتير جداً، وبتبدأ في شكل بقاقات صغيرة بتكبر بسرعة، والموية اللي جواها ممكن تكون صافية أو مائلة للاصفرار. ولأنو القطع بيحصل في أعلى طبقات الجلد، فالسقف بتاع الـ بقاقة ده بيكون هش وضعيف جداً لدرجة إنو بينفجر من أقل لمسة. العجيب في الموضوع إنو الـ بقاقة دي لما تنفجر، ما بتعمل القشرة اللي لونها زي العسل المعروفة في القوباء العادية، بل بتسيب وراها "ياقة" دائرية من القشور في الأطراف بتوريك إنو كان في بقاقة هنا وانفجرت.
الموضوع ده لو ما اتعالج صاح ممكن يتطور لمشكلة أكبر، لأنو السموم دي لو مشت في الدم، ممكن تخلي الجلد يتفكك في الجسم كله في حالة طارئة بنسميها (SSSS)، وكأنو الجسم انكب فيهو موية حارة.
أهم حاجة لازم نعرفها إنو الفقاقيع أو الـ بقاقات دي علاجها ما كورتيزون عشان ما تهبط ليها المناعة، لأنك كدة بتفتح الباب للبكتيريا تمرح زيادة. العلاج الأساسي هنا هو المضادات الحيوية عشان نوقف (المقصات) دي من إنها تدمر الجلد. فلو شفت بقاقة رقيقة في طفلك بدت تفرش وتعمل دوائر، ما تفتكرها مجرد حساسية، بل استشير الطبيب عشان يتأكد هل ده (خداع بكتيري) ولا حاجة تانية.
المرة الجاية حنتكلم عن "فطريات القدم" وكيف بتعمل بقاقات بعيداً عن مكان الإصابة الأصلي.
#عيادات_بيت_العافية
#عيادة_الجلدية_أون_لاين