بعد ما قفلنا ملف الفيتامينات، لازم نفتح باب تاني مليان بالخرافات التجارية اللي بتستنزف جيوب الناس كل يوم في الصيدليات، وهو باب المكملات السحرية
كمثال كبسولات وحلاوة البيوتين، السوشيال ميديا رسخت قناعة إنو سر الشعر الطويل والكثيف مربوط ببلع البيوتين بجرعات عالية يومياً، لكن طبياً، نقص البيوتين في جسم الإنسان العادي بيعتبر من أندر الأشياء في الطب، لأنو بكتيريا الأمعاء حقتنا بتصنعه جوانا بكفاءة عالية جداً وتغطي حوجتنا وزيادة لو إنت ما عندك نقص وراثي أو مرضي حقيقي
لكن الكارثة الحقيقية المخفية هي إنو البيوتين بتركيزه العالي ده ممكن يعمل تشويش تقني خطير جداً على أجهزة الفحص في المعامل الطبية، وممكن يطلع ليك نتائج مغلوطة تماماً لو احتجت تفحص هرمونات الغدة الدرقية، أو أسوأ من كدة، ممكن يخفي ارتفاع إنزيمات القلب لو مشيت الطوارئ بألم في الصدر، الشي اللي بيخلي التشخيص يضيع في لحظات حرجة جداً بسبب حباية فيتامين أخدتها عشان تطول شعرك.
وما بنقدر نقفل ملف المكملات المبالغ فيها من غير ما نقيف عند هوس العصر، وهو بودرة وحبوب الكولاجين، التسويق بقنعك إنك حتشرب الكولاجين وتصحى تلقاهو مشى طوالي شد ليك تجاعيد وشك، لكن المعدة عندها رأي تاني خالص
الكولاجين ده كيميائياً عبارة عن بروتين معقد، وأول ما ينزل المعدة عصارة الهضم بتكسره طوالي وتفتته لأحماض أمينية صغيرة زيه زي أي قطعة لحمة أو فول أكلتها، والجسم بعدين بياخد الأحماض دي ويوزعها حسب أولوياته هو، ممكن يبني بيها عضلة، وممكن يرمم بيها عظم، وما شرط أبداً يوديها لجلدك.
والمزعج أكتر انو ممكن تسبب موجات من حب الشباب المفاجئ والمتهيج، لأن التركيز العالي والمواد الحافظة بتلخبط بيئة البكتيريا الطبيعية وبتعمل إرهاق لسستم الجسم الداخلي، فالتغذية الحقيقية المتوازنة هي اللي بتدي جسمك "المونة" وهو ببني كولاجينه براهو بهدوء، من غير ما تشتري أوهام معلبة.
#عيادات_بيت_العافية
#عيادة_الجلدية_عن_بعد
#جلدك_مراية_أكلك