بعد ما تكلمنا عن فيتامين سي كأسمنت للكولاجين بالمنشور الفات، لازم ننتقل لعائلة تانية ما بتقل عنه أهمية من الفيتامينات اللي بتذوب في الموية ، وهي عائلة فيتامينات "ب" المركبة.
العائلة دي ما مجرد فيتامينات بتدي طاقة زي ما مشهور عنها في الدعايات، بل هي عبارة عن "فنيين الصيانة" المسؤولين عن سلامة شبكة الأعصاب والجلد في جسمنا، وعشان نستوعب دورها بعمق، لازم نعرف إنو الجلد ده مليان شبكة معقدة من النهايات العصبية اللي بتغذيه، ولما الأعصاب دي تتضرر لأي سبب، بنبدأ نحس بمشاكل مزعجة جداً ومحبطة زي حكة السكري المستفزة، اللي المريض بيهرش فيها لدرجة يجرح نفسه من غير ما يكون في أي طفح جلدي أو حساسية ظاهرة في المكان.
السبب الحقيقي وراء الحكة دي هو إنو مستويات السكر العالية في الدم مع الزمن بتدمر الغلاف الحامي للعصب، وبيقى العصب زي سلك الكهربا المكشوف اللي بيضرب شرار عشوائي بيترجمو المخ كحكة أو حرقان.
وهنا بيبرز الدور العلاجي العظيم لفيتامينات ب، وتحديداً ب١ وب٦ وب١٢، اللي بتشتغل زي العازل اللي بلف العصب المكشوف ده ويرممه من تاني
وبنفس الميكانيكية دي بتلعب العائلة دي دور بطولي في تسكين الألم الحارق جداً اللي بفضل مستمر وراء مرض الحزام الناري، لأنها بتسرع من استشفاء العصب المتضرر من الفيروس وبتهدي إشارات الألم الملتهبة.
أما على مستوى بنية الجلد الخارجية، فنقص أفراد العائلة دي بيعمل جوطة حقيقية وبيقلد أمراض تانية. مثلاً، نقص فيتامين ب٣ بيعمل مرض تاريخي اسمه البلاجرا، بيخلي الجلد يفقد حمايته ويتحسس جداً من الشمس، وتظهر فيه تسلخات وتصبغات قوية وسميكة خصوصاً حول الرقبة في شكل طوق مميز بنسميه طوق كاسال (شراب الكحول أحد أسباب نقصه الحاليه).
ونقص فيتامين ب٢ وب٦ بيخلي الجلد يتلخبط ويقلد أعراض الإكزيما الدهنية، فتظهر قشور وحمار حول الأنف والفم.
في خرافة شائعة برضو حولها وهي ربط تشققات زوايا الفم المؤلمة بنقص فيتامينات ب، بينما الحقيقة الطبية المثبتة إنو التشققات دي في الغالبية العظمى من الحالات بتحصل بسبب تجمع اللعاب والرطوبة المستمرة في زوايا الفم، الشيء اللي بيخلق بيئة ممتازة ومثالية جداً لنمو الفطريات زي الكانديدا أو البكتيريا
وعشان كدة علاجها الحقيقي والفعال بكمن في استخدام كريمات موضعية مضادة للفطريات والبكتيريا مع مرطبات عازلة قوية تمنع وصول اللعاب للمنطقة، بدل ما نجهد الكلى بتصريف فيتامينات ذوابة في الموية الجسم أصلاً ما محتاج ليها.
#عيادات_بيت_العافية
#عيادة_الجلدية_عن_بعد
#جلدك_مراية_أكلك