بعد ما قفلنا ملف الفيتامينات، لازم نفتح باب مهم جداً لواحد من أخطر وأهم المعادن في جسمنا، وهو الزنك، لو اعتبرنا الفيتامينات هي العمال اللي ببنوا حيطة الجلد، فالزنك ده هو "حارس البوابة" والمدير الأمني للمصنع كله.
الزنك معدن أساسي بدخل في أكتر من تلتمية تفاعل كيميائي جوة جسمنا، وهو المايسترو الفعلي لجهاز المناعة وعملية التئام الجروح وتجديد الخلايا، ورغم أهميته القصوى دي، جسمنا للأسف ما عنده مخازن كبيرة يقدر يحفظه فيها لوقت الحوجة، وعشان كده بنحتاج إمداد يومي ومستمر من الأكل عشان الحارس ده ما يغيب عن بوابته.
المفاجأة إنو نقص الزنك ما حاجة نادرة زي ما كتير من الناس متخيلة، بل هو شائع جداً في مجتمعاتنا، والسبب الأساسي برجع لاعتمادنا الكبير في أكلنا على النشويات والحبوب غير المخمرة اللي بتكون مليانة بمضادات التغذية زي مادة الفيتات، ودي بتمسك في معدن الزنك بقوة وتمنع أمعاءنا من امتصاصه والاستفادة منه.
لما يحصل النقص الحاد ده في الأطفال، القصة بتكون مؤلمة ومربكة جداً للأمهات، الطفل ببدأ يعاني من إسهال متكرر وتوقف في النمو ومناعة ضعيفة جداً، لكن العلامة الأوضح بتظهر على الجلد في شكل طفح جلدي عنيف والتهابات شديدة ومحمرة بتتمركز تحديداً حوالين الفم والعينين وفي منطقة الحفاضة والأطراف
ودي حالة طبية جينية أو مكتسبة معروفة في مراجعنا بنسميها التهاب الجلد الأطرافي المعوي. كتير من الأمهات بيلفوا بالطفل بين العيادات وبيصرفوا مبالغ طائلة على كريمات الكورتيزون والمضادات على أساس إنها حساسية شديدة أو التهاب حفاضات متمرد، في حين إنو العلاج السحري للمشكلة دي كلها بيتلخص في تشخيص دقيق وتعويض مدروس لمعدن الزنك المفقود، واللي بمجرد ما يدخل الجسم بيرجع يبني حاجز الجلد ويرمم المناعة وتختفي التسلخات دي في أيام بسيطة وكأنها لم تكن.
أما عند الكبار، فنقص الزنك بدينا إشارات خفية ومزعجة بتأثر على جودة الحياة، بتلقى الجروح البسيطة أو خدوش الجلد بتاخد زمن طويل جداً عشان تلتئم، والشعر ببدأ يتساقط بغزارة من كل أنحاء الفروة من غير سبب واضح، وحتى حاسة التذوق والشم بتبدأ تضعف والأكل بيبقى مسيخ ومجرد روتين.
ما صاح نبلع زنك برانا بدون مشورة، لأن الزنك لما يزيد عن حده جوة الجسم، بيقوم يطرد ويمنع امتصاص معدن تاني مهم جداً وهو النحاس، وبيدخلنا في دوامة أنيميا ومشاكل في الأعصاب نحنا في غنى عنها.
الحل الأمثل دايماً هو التوازن، إننا ناخد الزنك من مصادره الحيوانية الممتازة، أو من الحبوب المخمرة بخمارنا الطبيعي اللي بيكسر الفيتات، ونخلي كبسولات الصيدلية دي للضرورة الطبية اللي بحددها الفحص الدقيق، عشان نحافظ على بوابات جسمنا محروسة بأمان.
وربنا يديم عليكم نعمة الصحة، ويجعل العافية دايماً كاسية جلودكم.
#عيادات_بيت_العافية
#عيادة_الجلدية_عن_بعد
#جلدك_مراية_أكلك