(الدليل العملي الكامل)
يا أهلي وأحبابي في كل بيوت السودان، وصلنا لمحطتنا الأخيرة في رحلتنا مع "فيتامين الأعصاب والدم"، والمرة دي دايرين نختم بالخلاصة والعملي، عشان كل زول فينا يعرف المفروض يعمل شنو لو شك إنه الفيتامين بدأ يقل.
أول سؤال بخطر في البال: "أنا المفروض أفحص متين؟". الإجابة ببساطة، لو إنت نباتي وما بتاكل لحوم، أو كنت بتأخد دواء "المنظم" للسكر لأكتر من ٤ سنين، أو عمرك فات الستين، أو عملت قبل كدة أي عملية في معدتك أو أمعاءك، فإنت لازم تفحص.
وكمان لو بدأت تحس بتنميل في رجلينك، أو شفت اسمرار غريب في مفاصل أصابعك أو أظافرك، أو كنتِ حامل أو بتراجعي عشان رضاعة طبيعية، فحص الـ B12 هنا ما رفاهية، ده ضرورة قصوى.
بس انتبهوا لنقطة مهمة؛ فحص صورة الدم العادي (CBC) الممكن تعمله في أي معمل "بيفوّت" حالات كتيرة جداً، وعشان كدة لو الشك جدي، أطلب من المعمل فحص الـ B12 "النشط" (HoloTC) لأنه الأدق، وأحياناً بنحتاج فحوصات تانية تأكيدية زي الـ MMA عشان نقطع الشك باليقين.
طيب، لو الفحص طلع فعلاً فيهو نقص، نمشي كيف في العلاج؟
العلم بيقول لينا عندنا سكتين، وكل سكة عندها نظامها ودقتها، لو الطبيب شاف إنه حالتك بتحتاج "حقن" بالذات لو في تنميل شديد أو تعب أعصاب، فغالباً حتبدأ بحاجة بنسميها (جرعة الشحن)، ودي بتكون زي ٥ لـ ٦ حقن في العضل، حقنة يوم بعد يوم أو ٣ مرات في الأسبوع لمدة أسبوعين، والهدف منها إننا "نملأ التانك" الفاضي ده بسرعة ونلحق الأعصاب قبل ما تتدمر.
بعد الأسبوعين الأوائل ديل، بنمشي لجرعة "المحافظة" ودي بتكون حقنة واحدة كل شهرين لـ ٣ شهور لو كنت بتاخد نوع اسمه (هيدروكسوكوبالامين)، أو كل شهر لو كان النوع التاني (سيانوكوبالامين).
أما الناس الما بيحبوا الحقن أو حالتهم بسيطة، فالبشرى إنه "الحبوب الفموية" فعّالة جداً وبتقوم بالواجب وزيادة، بس بشرط مهم: إنك تاخد حبة قوتها ١٠٠٠ ميكروغرام كل يوم من غير انقطاع لمدة ٣ شهور على الأقل كبداية علاجية،وما تستهون بالحبوب، لأن العلم أثبت إن الجرعة العالية دي (١٠٠٠ ميكروغرام) بتقدر تعبر للدم حتى لو امتصاصك تعبان، بس لازم تلتزم بالزمن اليومي.
وطبعاً في حالات تلف الأعصاب الشديد أو الناس القفلوا "باب المعدة" نهائي بعمليات التكميم، الحقن هنا بتكون أضمن وأسرع في البداية عشان نكسب الوقت.
والسؤال المهم: متين نفحص تاني عشان نتأكد إنه الأمور ظبطت؟
النصيحة الطبية بتقول ما تستعجل وتفحص بدري، لأن الجسم بحتاج وقت عشان يبني خلايا دم جديدة ويصلح التلف، أحسن وقت للفحص التأكيدي بكون بعد شهرين لـ ٣ شهور من بداية العلاج، والهدف هنا ما بس نشوف الرقم زاد كم، لكن الأهم نشوف إختفاء الاعراض وعودةالنشاط، وبعد كدة ممكن نكتفي بفحص دوري كل سنة لو الأمور استقرت وبقينا ماشين على جرعة وقائية بسيطة تحافظ على المكتسبات.
ختاما بوجه نداء لكل زملائي الأطباء والصيادلة في السودان إنهم يفتحوا عيونهم كويس للحالات دي، خاصة في ظل ظروفنا الحالية اللي خلت سوء التغذية ينهش في جسم أهلنا، نقص الـ B12 مرض "رخيص العلاج" لو اكتشفناه بدري والتزمنا بجرعاته، لكنه "غالي الثمن" جداً في أثره لو أهملناه. عافيتكم هي راس مالنا، وربنا يديم عليكم الصحة والستر في كل خطوة.
#عيادات_بيت_العافية
#عيادة_الجلدية_أون_لاين