(المفاجأة غير المتوقعة)
بالمنشور الخامس قلنا إنه لو نقص بعمل "اسمرار" في المفاصل، لكن هو نفسه ممكن يكون "سند وعلاج" عشان نرجع اللون الطبيعي في حالات البهاق! الحكاية غريبة وبتشبه السحر، لكنها علم حقيقي ومثبت.
العلم بيقول إن نقص B12 برفع مادة في الجسم اسمها "هوموسيستين"، والمادة دي زي السم لخلايا الصبغة (الميلانوسايت)، بتخليها تضعف وتموت وما تقدر تطلع لونها الطبيعي، وعشان كدة، لما نعوض النقص ده ونرفعه في الجسم، كأننا بنرفع الحصار عن الخلايا دي وبنحميها من التسمم عشان ترجع تشتغل تاني وتلون الجلد.
وفي تجربة عالمية مشهورة جداً، جابوا ١٠٠ مريض بهاق وادوهم B12 يومياً مع حمض الفوليك وطلبو منهم يقعدوا في الشمس شوية، والنتيجة كانت مذهلة بجد؛ ٦٤٪ من المرضى البهاق عندهم "وقف" وما زاد تاني، وحوالي نصهم بدأت الصبغة ترجع لجلدهم من جديد، وفي ناس شُفوا تماماً بفضل الله، طبعاً ده ما معناه إنه علاج سحري ووحيد، لكنه إضافة "رخيصة وآمنة" جداً لأي بروتوكول علاج بياخده المريض، وممكن تسرع الشفاء بصورة جيدة.
لكن زي ما بنقول "الزيادة أخت النقصان"، ففي تحذير مهم جداً لازم يتعرف بخصوص الـ B12 الزائد؛ أحياناً الحقن القوية أو المكملات بجرعات خرافية ممكن تعمل "حب شباب مفاجئ" وشكله بكون غريب
بظهر فجأة في الوش والظهر، وبكون بحرّق أو بياكل الزول (حكة)، وميزته إنه ما بكون فيهو "رؤوس سوداء" زي حب الشباب، وسببو إن الفيتامين الزائد بشجع نوع معين من بكتيريا الجلد إنها تفرز مواد ملتهبة، والحل هنا بسيط خالص؛ بمجرد ما توقف الفيتامين أو تنظم جرعتك مع الطبيب، الحبوب دي بتختفي تماماً من غير ما تسيب أثر دائم.
عافيتكم في التوازن، وفي المنشور الجاي والأخير، حنختم سلسلتنا بـ "الدليل العملي" عشان نعرف نفحص وين، والتحاليل المطلوبة شنو، ونعالج كيف، عشان نقفل ملف الـ B12 ده ونحن فاهمين كل تفاصيله.
#عيادات_بيت_العافية
#عيادة_الجلدية_أون_لاين