في رحلتنا مع جلد الكفين والقدمين، اتكلمنا المرة الفاتت عن كيف إنو شكل السُماكة بيدينا مفتاح للتشخيص، الليلة حنقف مع أكتر سبب بيخلي الناس تجينا في العيادة بالشكوى (تشقق القدمين)، وهو السُماكة البتحصل بسبب الضغط الميكانيكي، أو ببساطة: السُماكة البتحصل كـ "رد فعل" أو دفاع من الجلد.
لما تمشي مسافات طويلة، أو تلبس جزمة ضيقة، أو يكون شغلك بتطلب وقفة لساعات طويلة، الجلد بحس بالخطر من الضغط المستمر ده، وطوالي ببدأ يبني "درع" من بروتين الكيراتين عشان يحمي الأنسجة الداخلية من التمزق، والمفارقة إنو الدرع ده لو زاد عن حدو، بيتحول لعذاب، خصوصاً لو كانت القدم بتعرق كتير وشراباتك مبلولة بالعرق، لأنو الرطوبة دي بتزيد من قوة الاحتكاك بدل ما تقلله.
الدرع ده بيظهر لينا في تلاتة أشكال رئيسية بتختلف في خطورتها وألمها.
الشكل الأول والأبسط هو الثفن أو الكالوس العادي، وده عبارة عن سُماكة منتشرة ومفروشة على مساحة واسعة من باطن القدم أو الكف، مافيها قلب صلب جوه، وغالباً ما بحل معاها ألم شديد، بل بتعتبر درع حماية طبيعي بيساعدك تتحمل المشي.
لكن المشكلة بتبدأ لما الضغط يكون متركز في نقطة واحدة صغيرة شديد، هنا الجلد بيبني الكيراتين ده لـ "جوه" في شكل مخروط أو مسمار بضغط طوالي على النهايات العصبية زي كأنو جسم غريب مدفون في اللحم، وده البنسميه عين السمكة أو المسمار (Corn)، وألمو بيكون حاد جداً زي كأنك دايس على شوكة، وممكن يظهر بين الأصابع ويكون رطب ولين بسبب العرق المقفول.
أما الحالة التالتة والأخطر، واللي بتخلي حياة المريض جحيم حرفياً، بنسميها طبياً النتوء الراحي الأخمصي الصعب (IPK). دي ما مجرد سُماكة عادية، دي كتلة صلبة جداً وقاسية بتتكون تحت رؤوس عظام مشط القدم، والمريض بيوصف الإحساس كأنو "بيمشي ليهو على حجر أو زلطة طول اليوم".
المسألة هنا ما مشكلة جلدية بحتة، بل مشكلة في "هندسة" وعظام القدم ذاتها؛ زي إنو قوس القدم يكون عالي شديد، أو القدم مسطحة، أو في عظمة في المشط نازلة لتحت أكتر من الباقين فبتشيل وزن الجسم كلو في نقطة واحدة.
الألم الشديد مع المشي ما مفروض نتجاهلو أو نتعايش معاهو، وما بيتحل بمجرد إنك تقطع الجلد الزايد في البيت بموس، لأنو حيرجع تاني أشرس من الأول، لازم تستشير طبيب متخصص عشان يعالج السبب الجذري، سواء كان تغيير نوع الحذاء، أو تفصيل فرشات طبية، أو تدخل طبي دقيق.
في البوست الجاي، حندخل في حتة شائكة جداً وبتحير حتى الدكاترة مرات: لما تظهر ليك سُماكة وحكة وقشور في يدك، هل دي صدفية ولا إكزيما؟ وكيف بنقدر نفرق بينهم؟
#عيادات_بيت_العافية
#عيادة_الجلدية_أون_لاين