البهاق ما عيب ولا عدوى

البهاق ما عيب ولا عدوى

"يا دكتور، العريس ده زول كويس وأخلاقه سمحة، بس عمو عنده بهاق، خايفين نوافق والجينات دي تنتقل لأولادنا، رايك شنو؟"

السؤال ده بيتردد كتير في مجتمعاتنا، وأحيانا بتم رفض زيجات وتدمر علاقات بسبب الخوف من البهاق، عشان كدة، السلسلة دي معمولة عشان نفكك الخوف ده ونفهم البهاق بالعلم، ونبسط المفاهيم الطبية المعقدة بعيداً عن الخرافات والوصمة الاجتماعية.

البهاق هو مرض جلدي بحصل فيه تدمير وفقدان لخلايا الصبغة المسؤولة عن لون الجلد، واللي بنسميها علمياً "الميلانوسيت"، لما الخلايا دي تتدمر، بتظهر بقع بيضاء أو فاتحة واضحة المعالم في الجلد، الموضوع كله عبارة عن خلل مناعي داخلي، يعني البهاق ما مرض معدي بأي شكل من الأشكال، فما بنتقل بالمصافحة، ولا بالمؤاكلة، ولا بالمجاورة

العلماء بصنفوا البهاق على إنه مرض معقد متعدد الأسباب، يعني عشان يظهر، لازم تتوفر ظروف مثالية بتتجمع فيها قابلية جينية موروثة، مع توتر موضعي في الخلايا، وخلل في الجهاز المناعي، بالإضافة لمحفزات بيئية خارجية بتشتغل كشرارة.

المرض في أساسه بيعتبر مرض مناعة ذاتية، يعني هجوم من جهاز المناعة الداخلي على خلايا الصبغة السليمة، وعندو علاقة عكسية مع أشرس أنواع سرطان الجلد (الميلانوما) بحيث يحمي منها، عشان كده بيظن أنو استجابة فائقة أكتر من اللازم لعملية تصحيحة عادية ضد السرطان، فالعندهم بهاق أبعد ما يكونوا عن السرطان ده.

الإحصاءات العالمية بتأكد إن البهاق بصيب بين 0.5% لـ 2.0% من كل سكان العالم، بغض النظر عن عرقهم أو جنسهم في المتوسط، لكن في الشعوب الأفريقية، النسبة دي بتكون أعلى شوية وبتتراوح بين 1% لـ 2.5%.

المشكلة الحقيقية للبهاق ما في الألم العضوي، لأنو ما بسبب أذى جسدي مباشر، لكن الوجع الحقيقي هو الأثر النفسي العميق، في مجتمعاتنا، التباين اللوني الواضح بخلق عبء نفسي وتقييم اجتماعي قاسي جداً.

الأبحاث اللي اتعملت في مستشفى الخرطوم للأمراض الجلدية كشفت رقم مفزع؛ واحد وتلاتين في المية من مرضى البهاق البالغين في السودان بعانوا من اضطرابات نفسية حقيقية وقابلة للقياس، بتبدأ من القلق الاجتماعي والخجل، وبتصل لحد الاكتئاب السريري.

الأرقام دي بتقول لينا إن الوصمة الاجتماعية اللي بنخلقها بتخويفنا لبعض من البهاق، بتدفع ثمنها أرواح ونفسيات ناس عايشين بينا ومحتاجين دعمنا. في المنشورات الجاية، حندخل في عمق الجينات، وحنعرف بالأرقام الحقيقية كيف بينتقل المرض، ومتين نخاف، ومتين نطمئن.

________________________________________

عناوين الحلقات القادمة من السلسلة:

1. المنشور الثاني: هل البهاق وراثي؟ - السؤال الصاح ليهو جواب دقيق

https://www.facebook.com/share/p/1BMqPqkNau/

2. المنشور الثالث: كم احتمال أن يورّث الوالد البهاق لأبنائه؟ - الأرقام الحقيقية

https://www.facebook.com/share/p/1ETSQv8q6Z/

3. المنشور الرابع: من الأم أم من الأب؟ - نسب خطر القرابة الدقيقة

https://www.facebook.com/share/p/1Cp8EhGHF6/

4. المنشور الخامس: البهاق القطعي وبهاق الجسم كله - ما كلو نوع واحد

https://www.facebook.com/share/p/1BjaAxXnY2/

5. المنشور السادس: زواج الأقارب والبهاق في السودان - حين تتضاعف الأرقام

https://www.facebook.com/share/p/1BCywxoqJa/

6. المنشور السابع: ليه البهاق زاد في بعض الناس وقل في آخرين؟ - دور البيئة والمحفزات

https://www.facebook.com/share/p/1AwwZXAeqy/

7. المنشور الثامن: خلاصة الصورة كاملة - ما يجب أن يعرفه كل سوداني

https://www.facebook.com/share/p/1CxxZFc7Z6/

#عيادة_الجلدية_أون_لاين

#عيادات_بيت_العافية