زمان كان بنسمع كتير أن البشرة الداكنة ما بتحتاج واقي شمسي لأن عندها حماية طبيعية، محتاجين نفكك المقولة دي بعناية عشان نفهم الصحيح فيها والمحتاج تعديل جوهري.
بشرتنا الداكنة جواها مادة اسمها الميلانين (melanin)، البتدّي الجلد لونو البني والأسمر، والميلانين درع طبيعي قبال ما يكون لون جمالي، وهو بحمي بشرتنا فعلاً من نوع معين من أشعة الشمس، وبخلينا أقل عرضة لحرق الشمس الشديد البصيب البيض، وأقل عرضة لبعض أنواع سرطان الجلد.
وبالفعل الإحصائيات بتقول إن السرطانات الشائعة في الجلد، زي السرطان القاعدي (basal cell carcinoma) والحرشفي (squamous cell carcinoma)، أقل في الناس اللي بشرتهم داكنة بنسبة كبيرة جداً.
لكن السودانيات بجن بكلف على الوجنتين والجبهة، وتصبغات داكنة بعد كل حبة بسيطة، وهالات سوداء تحت العيون، وبقع غامقة في الرقبة والأكواع، وفروقات في لون البشرة بين الوجه والجسم، والشكاوى دي نادراً ما بتصيب البيض، وعندنا بقت تقريباً ظاهرة جماعية.
وده لأنو الميلانين في بشرتنا بحمي من نوع واحد من أشعة الشمس، وما عندو نفس القوة في الحماية من الأنواع التانية، فأشعة الشمس عبارة عن طيف واسع، فيها الأشعة فوق البنفسجية من نوع B (UVB) اللي الميلانين بقدر يصد جزء كبير منها، والأشعة فوق البنفسجية من نوع A (UVA) اللي بتمشي أعمق وبتلف وبتشيخ الجلد والميلانين ضعيف قدامها، والضوء المرئي (visible light) اللي بنشوفو بعيوننا، والاكتشاف الكبير في السنين الأخيرة كان إنو ده العدو الحقيقي للبشرة الداكنة.
يعني الميلانين بحمينا من السرطانات الشائعة وحرق الشمس، وفي نفس الوقت بترك بشرتنا مكشوفة للأشعة البتسبب أكتر مشاكلنا المرئية: الكلف، والتصبغات بعد الحبوب، والاسمرار غير المتساوي.
في حقيقة تانية أصعب من دي: لما بحصل سرطان جلد من نوع الميلانوما (melanoma) في بشرة داكنة، بكون أخطر وأكتر فتكاً منو في البشرة الفاتحة، والسبب إنو ما في زول بتوقع السرطان في بشرة داكنة، فالتشخيص بتأخر والمرض بتقدم، والإحصائيات بتقول إن نسبة الوفاة من الميلانوما عند الأمريكان السود أعلى منها عند البيض بنسبة كبيرة، حتى لو الإصابة براها أقل.
والواقع البنبني عليه السلسلة دي: البشرة الداكنة ما محتاجة واقي شمس أقل، هي بتحتاج واقي شمس مختلف، واقي بحمي من الأشعة الصاح، وبناسب طبيعة بشرتنا وخصوصيتها
في البوست الجاي حندخل في تفاصيل الطيف الشمسي بالكامل، وحنعرف ليه الضوء المرئي بقى موضوع البحث الأكبر في طب الأمراض الجلدية للبشرة الداكنة، وكيف الاكتشاف ده غيّر فهمنا لكل واقيات الشمس الموجودة في السوق.
ودمتم بصحة وعافية 🌿
#حكاية_الشمس_والبشرة #عيادات_بيت_العافية #عيادة_الجلدية_أون_لاين