"يا دكتور، ظفري بقى زي الملعقة، هل دا من نقص الحديد؟"
فعلاً دي واحدة من أشهر العلامات الكلاسيكية، لكن زي كل علامات الظفر في السلسلة دي، الظفر ما بيدي حكم نهائي، الظفر بيدينا خيط، ونحن نمشي وراه بعقل
الحالة دي اسمها الأظافر الملعقة أو Koilonychia، ومعناها إن صفيحة الظفر فقدت تحدبها الطبيعي وبقت مقعرة، بدل ما الموية تنزلق من فوقها، ممكن تقيف في النص، عشان كدا في اختبار بسيط مشهور اسمه اختبار قطرة الماء، تخت نقطة موية صغيرة على سطح الظفر، لو الظفر طبيعي غالباً القطرة حتجري وتمشي، لكن لو الظفر مقعر شديد، القطرة ممكن تقعد في النص كأنها واقفة في ملعقة صغيرة، الاختبار لطيف ومفيد كصورة ذهنية، لكنه ما تحليل دم، وما مفروض يتحول لحكم طبي نهائي
لما الحديد ينقص لفترة طويلة، قدرة الدم على حمل الأكسجين بتقل، والخلايا سريعة النشاط زي خلايا المصفوفة البتطلع الظفر بتتأثر، فالظفر بطلع أرق، أضعف، وأقل تماسكا، ومع الزمن ممكن ينحني للداخل بدل ما يثبت في قوسه الطبيعي
الزول ممكن يكون عايش شهور وهو متعود على التعب، والدوخة الخفيفة، وخفقان مع طلوع السلم، وبرودة الأطراف، وتساقط الشعر،و تشقق زوايا الفم، أو رغبة غريبة في أكل الثلج أو الطين أو النشا، ويقول لنفسه: "دي إرهاق عادي"، بعدين يجي الظفر كأنه آخر زول في البيت لاحظ المشكلة وقال: يا جماعة، الحاصل ده ما طبيعي، عشان كدا لمن نشوف أظافر ملعقة، خصوصاً لو معها شحوب أو تعب أو دورة شهرية غزيرة، ما بنكتفي بالنظر، بنطلب صورة دم كاملة ومخزون الحديد Ferritin، ومعاها فحوصات الحديد حسب الحالة
لكن مهم جداً ما نختصر الدنيا كلها في الحديد، في أطفال صغار، خصوصاً تحت عمر سنتين، ممكن نشوف شكل ملعقي خفيف في أظافر الرجلين ويكون طبيعي ويمشي مع النمو، وفي بعض الناس، الصدمات المتكررة، الشغل اليدوي، التعرض المستمر للماء والمنظفات، أو بعض الأمراض الجلدية والمناعية، ممكن تعمل تغيرات تشبه الملعقة، وفي حالات أقل شيوعاً، الغدة الدرقية، أمراض النسيج الضام، أو حتى اضطرابات امتصاص الغذاء قد تدخل في القصة، لذلك الطبيب ما بعاين للظفر براهو، وإنما للزول الكلو: عمره، أكله، دورته الشهرية، أمعاؤه، وزنه، نشاطه، وأي أعراض ماشية معاه في الخلفية
والعلاج برضو ما سريع زي ما الناس بتتوقع، حتى لو بدأنا تعويض الحديد بالطريقة الصحيحة، الظفر القديم ما حيتبدل في أسبوع، لأن الظفر بطيء ومؤدب وما بستعجل عشان يرضينا، ظفر اليد يحتاج شهور عشان يطلع من جديد، وظفر الرجل أبطأ بكثير، التحسن الحقيقي بنشوفه في الظفر الجديد الطالع من القاعدة، ما في الطرف القديم المتأثر، لذلك المتابعة بتحتاج صبر، وتصحيح السبب بحتاج التزام
والأهم من الحديد نفسه معرفة سبب نقصه، لأنك لو مليت الخزان وما قفلت التسريب، حيرجع يفضى، لو المشكلة دورة شهرية غزيرة، نعالجها، لو المشكلة نزيف هضمي، نفتش عنه، لو المشكلة أكل فقير بالحديد، نصلح المائدة، لو المشكلة امتصاص، نبحث في الأمعاء، الطب الجيد ما بفرح بالتحليل لما يتحسن فقط، الطب الجيد بسأل: ليه التحليل وقع من البداية؟
في البوست الجاي حندخل في واحدة من أشهر الخرافات اليومية: النقطة البيضاء في ظفر الولد، هل فعلاً معناها نقص كالسيوم؟ ولا مجرد خبطة صغيرة المصفوفة سجلتها ونستها الأسرة؟
الحلقة القادمة: النقطة البيضاء في الظفر وأسطورة الكالسيوم
#حكاية_الظفر #عيادات_بيت_العافية #عيادة_الجلدية_أونلاين