معظم الناس بمجرد ما تشوف الظفر اتفصل من اللحم بتفكر في الفطريات، لكن الحقيقة إنو الانفصال الجزئي للظفر أو Onycholysis هو علامة سريرية ما تشخيص (زي الصداع مثلا)، والعلامة دي ممكن تظهر من ضربة بسيطة، أو فطريات، أو صدفية، أو أدوية، أو أحيانا من الغدة الدرقية
الانفصال الجزئي معناهو إنو صفيحة الظفر، وهي الطبقة الصلبة البنشوفها، انفصلت عن السرير البتحتها، والسرير دا هو الجلد الوردي المليان شعيرات دموية البيدي الظفر لونو الصحي، فلما الظفر يكون ملتصق بالسرير، بنشوفو وردي وشفاف، لكن لما ينفصل ويدخل الهواء تحتو، المنطقة المنفصلة بتتحول للون أبيض أو أصفر باهت، كأنها مساحة فاضية تحت القزاز، ودي النقطة المهمة: اللون الأبيض هنا ما نقص كالسيوم ولا نقص فيتامين، هو ببساطة هواء دخل بين الظفر والسرير
أكثر سبب بسيط هو الصدمة المتكررة، ما شرط ضربة كبيرة، أحيانا مجرد أظافر طويلة بتخبط في الكيبورد أو الموبايل أو الغسيل، أو حذاء ضيق يضغط على ظفر الرجل، أو تنظيف عدواني تحت الظفر، أو استعمال أدوات المانيكير بعنف، كل دا ممكن يفك الظفر من سريره بالتدريج، وهنا غالبا الإصابة بتكون في ظفر واحد أو اتنين، والحافة المنفصلة بتكون ناعمة ومنتظمة نسبيا، والتاريخ بيدينا المفتاح: في احتكاك، ضغط، شغل يدوي، أو عادة تنظيف تحت الظفر
السبب الشائع التاني هو الفطريات، ودي خصوصا في أظافر الرجل، بتبدأ غالبا من الطرف أو الجنب، وتعمل انفصال مع اصفرار أو بنيان، وسماكة تحت الظفر، وتفتت في الطرف، وأحيانا ريحة أو تراكم مادة طباشيرية تحت الصفيحة
الصدفية برضو من الأسباب المهمة، ودي بتعمل انفصال مميز في الظفر، مرات يكون حول الفراغ الأبيض حافة حمراء أو صفراء، ومرات نشوف تحت الظفر لون أصفر برتقالي شفاف كأنو في نقطة زيت محبوسة تحت الصفيحة، ومعاها ممكن تكون في حفر صغيرة على سطح الظفر، أو ألم وتيبس في المفاصل الصغيرة، وهنا الظفر ما بكون مشكلة تجميلية فقط، لأنه ممكن يكون إشارة لالتهاب مفاصل صدفي بحتاج انتباه مبكر
في سبب مهم جدا بننساه وهو الأدوية والشمس، بعض الأدوية بتخلي الظفر حساس للضوء، فيحصل انفصال مؤلم أو مفاجئ خصوصا في الأظافر المعرضة للشمس، ودي بنسميها Photo-onycholysis، ومن أشهر الأمثلة بعض المضادات الحيوية زي الدوكسيسايكلين، وبعض أدوية السرطان، وأدوية أخرى حسب الحالة، المريض هنا يلاحظ إنو المشكلة ظهرت بعد دواء جديد أو بعد سفر وشمس قوية، وقد تكون في عدة أظافر مع إحساس ألم أو حرقة تحت الظفر، والحل بكون بمراجعة الدواء مع الطبيب وحماية اليدين من الشمس
أما العلامة الكلاسيكية البتخلينا نفتش داخليا فهي انفصال الظفر المرتبط بفرط نشاط الغدة الدرقية، واسمها الكلاسيكي Plummer’s nails، فيها الظفر ينفصل من الطرف، غالبا في الإصبع الرابع أو الخامس، ويظهر تحته فراغ أبيض أو متسخ بسبب تراكم الأوساخ تحت المنطقة المفصولة، ومعاها قد تكون الأظافر لامعة وطرية وسريعة النمو، والمريض عنده أعراض تانية، هنا الظفر بقول ليك "افحص الغدة"
في علامات خطيرة لازم ننتبه ليها، لو الانفصال في ظفر واحد ومعاه خط أسود أو بني متسع، أو نزيف متكرر، أو كتلة تحت الظفر، أو ألم شديد بدون سبب واضح، أو فشل في التحسن رغم العلاج، لازم هنا نستشير طبيب جلدية ونعمل منظار ظفر وربما عينة، لأن بعض الأورام تحت الظفر، رغم ندرتها، ممكن تبدأ كأنها انفصال بسيط أو فطر مزمن، ودي بالذات في الإبهام أو إصبع القدم الكبير عند البالغين ما مفروض تتعامل كفطريات لسنوات بدون تأكيد
العناية اليومية مهمة جدا، لأن الجزء المفصول من الظفر ما برجع يلصق تاني في نفس المكان، لكن الظفر الجديد وهو نازل لقدام ممكن يطلع ملتصق وسليم لو أوقفنا السبب، لذلك الأفضل نقص الجزء الطويل المفصول بحذر بدون حفر، نخلي الأظافر قصيرة، نمنع التنظيف العميق تحت الظفر، نتجنب الموية والمنظفات الطويلة، نستعمل قفازات عند الغسيل، وما نلصق أظافر صناعية فوق الظفر المفصول، لأنها بتحبس الرطوبة وبتزيد الفطريات والبكتيريا، والهدف إننا ندي السرير فرصة يستقبل الظفر الجديد النامي من الخلف
في البوست الجاي حننتقل للمرحلة الثانية من السلسلة، ونبدأ بأشهر علامة يربطها الناس بالنواقص الغذائية: الأظافر الزي الملعقة ونقص الحديد، وحنعرف اختبار قطرة الماء، ومتى تكون الملعقة علامة فقر دم ومتى تكون طبيعية عند الأطفال
الحلقة القادمة: الأظافر الملعقة ونقص الحديد
#حكاية_الظفر #عيادات_بيت_العافية #عيادة_الجلدية_أونلاين