في مقدمة الجبهة وحوالين خط الشعر، أحيانا الحبوب بتترتب كأنها ماشّة على حدود مرسومة بالقلم، ما منتشرة في كل الوش، وما بالضرورة بتزيد قبال الدورة، ولا شكلها شبه حبوب الذقن الهرمونية، موقعها براهو بديك مفتاح القصة: الحتة القريبة من الشعر
ده النوع البنسميهو حب شباب دهانات الشعر (Pomade Acne)، وبيحصل لمن الزيوت والكريمات الثقيلة البتتخت في الشعر تنزل بخفة على الجبهة والصدغين وخط الشعر، زيت جوز الهند، زبدة الشيا، كريمات التثبيت، الجل، الزيوت الطبيعية الكثيفة، والخلطات الدهنية ممكن تكون ممتازة للشعر عند زول، ومزعجة للبصيلة الجلدية عند زول تاني، المشكلة لأنها تقيلة وممكن تقفل البصيلة في مكان حساس أصلا للحبوب
الشعر السوداني والأفريقي عموما بحتاج عناية خاصة، وكثير من الناس بستخدموا منتجات أغنى وأثقل عشان الجفاف، والتسريح، والحماية من التكسر، وتثبيت الشكل، دي حوجة حقيقية، وما بنقدر نلغيها بنصيحة جافة زي "ما تستخدموا زيوت"، وإنما المطلوب نفهم الطريق البمشي بيهو المنتج، لو الكريم بيلامس خط الشعر يوميا، ولو الزيوت بتسيح مع الحر والعرق، ولو المخدة بتشيل جزء من المنتج وترجع تختو على الوش بالليل، فالبصيلة بتتعرض لكتمة متكررة، والكوميدونات تبدأ تظهر في نفس المناطق دي
الملاحظة العملية هنا بسيطة: لو الحبوب مركزة في الجبهة والصدغين وخط الشعر، فتش في منتجات الشعر قبال ما تفتش في عشرة أسباب بعيدة، جرّب تخفف الكمية، تبعد المنتج قدر الإمكان من خط الشعر، تغسل المخدة بانتظام، وتخت المنتجات الأخف والأقل دهنية لو بشرتك قابلة للحبوب، وبرضو بعد المسح في الشعر، اغسل الايدين قبال ما تلمس وشك، لأن المنتج ممكن ينتقل من غير ما تنتبه
في مؤخرة الرأس في قصة تانية أكثر جدية، خصوصا عند الشباب أصحاب الشعر المجعد أو الخشن، التهاب بصيلات مؤخرة الرأس الجدرائي، أو حب الشباب الجدرائي القفوي (Acne Keloidalis Nuchae)، ببدأ بحبوب صغيرة وحكة أو ألم في مؤخرة الرأس، ومع الحلاقة بالموس اللي بتتجر للرقبة، واحتكاك الياقات، والحر والرطوبة، ممكن يتحول لعقيدات قاسية وندوب جدراء وفقدان شعر دائم في المنطقة
العلاج المبكر هنا مهم، لأنو في الجبهة بنحاول نمنع التصبغ، وفي مؤخرة الرأس بنحاول نمنع الندبة وفقدان الشعر، وفي حالات نادرة لكنها شديدة بتكون خطر على الصحة العامة، وحنحدث عنها في البوست الجاي
#حكاية_حب_الشباب #عيادات_بيت_العافية #عيادة_الجلدية_أون_لاين