لما ما يكون حب شباب

في حبوب شكلها بقول حب شباب، لكن سلوكها بقول حاجة تانية، حبوب صغيرة، متشابهة شديد، طالعة في الصدر أو الظهر أو الكتفين، أحيانا في الجبهة، ومعاها حكة مزعجة، وكل ما الزول يستعمل مضاد حيوي للحبوب تتحسن شوية أو ما تتحسن كلو كلو، وبعدها ترجع بعناد أكتر، هنا لازم نوقف ونراجع التشخيص قبل العلاج

واحدة من أشهر الحالات البتتلخبط مع حب الشباب اسمها التهاب الجريبات بالمالاسيزيا (Malassezia folliculitis)، المالاسيزيا دي فطريات خميرية عايشة أصلا على جلدنا، بتحب الدهون والحر والرطوبة والعرق والكتمة، في ظروف معينة، خصوصا مع الجو الحار الرطب، والملابس الضيقة، والتعرق، أو استعمال مضادات حيوية لفترة طويلة، بتزيد زيادة مزعجة داخل فتحات الشعر، فتعمل بثور صغيرة وحاكة

الفرق المهم إن حبوب المالاسيزيا غالبا بتكون متشابهة في الحجم والشكل، كأنها نسخ من بعض، وبتحك، أما حب الشباب الحقيقي فغالبا فيهو خليط: رؤوس بيضاء، ورؤوس سوداء، وحبوب حمراء، وبثور قيحية، وأحيانا عقد أعمق، وجود الكوميدونات بدعم تشخيص حب الشباب، وغيابها مع حكة واضحة وتوزيع في الصدر والظهر بخلينا نفكر في المالاسيزيا

الغلط الشائع إن الزول يفتكر أي بثور في الضهر والصدر حب شباب، فيمشي يستعمل مضاد حيوي موضعي أو حبوب مضاد لفترة طويلة، والمفارقة إنو المضاد الحيوي ممكن يقلل البكتيريا المنافسة ويخلي المالاسيزيا ترتاح أكتر، فتزيد الحكة والبثور، يعني العلاج البنفع في حالة ممكن يضر في حالة تانية، عشان كده التشخيص الصحيح مهم

التشخيص بحتاج أحيانا فحص بسيط بالكشط الخفيف KOH preparation أو التزريع للفطريات حسب الحالة، العلاج هنا ما بكون نفس خطة حب الشباب، بل غالبا بيدخل فيهو مضاد فطري مناسب، مع تقليل الكتمة والعرق المتراكم، وغسل الملابس الرياضية، وتجنب الزيوت الثقيلة على المناطق المصابة

وفي البوست الجاي حنشوف حالة تانية بتتشبه بحب الشباب في الوش، لكنها ماشّة بقانون مختلف تماما

#حكاية_حب_الشباب #عيادات_بيت_العافية #عيادة_الجلدية_أون_لاين