في أكلات بتقدر تشغّل إشارات داخل الجسم تخلي البشرة القابلة لحب الشباب تشتعل أكتر
أقوى دليل اليوم ماشي في اتجاه الحمل الجلايسيمي (glycemic load)، يعني الأكل البيرفع السكر بسرعة وبخلي الإنسولين يطلع بسرعه، ولمن الإنسولين يزيد، برفع معاهو العامل النموي شبيه الإنسولين رقم واحد (IGF-1)، وده بيدفع مسار بقول للغدة الدهنية: اصنعي زهم أكتر، ولخلايا البصيلة: اتكاثري واتماسكي أكتر، هنا البثرة ما بتطلع لأن الباسطة مشت وقفت في الخد، بل لأن الجسم استلم رسالة نمو وتصنيع أعلى من اللازم
في واقعنا السوداني، الكلام ده بخلينا نعاين بريبة للشاي المليان سكر، للعصائر المحلاة، والباسطة، والزلابية، والكيك، والبسكويت، دي كلها ما ممنوعات أبدية، لكنها لو بقت عادة يومية، خصوصا عند زول عندو قابلية وراثية وحبوب ملتهبة، ممكن تكون جزء من النار البتتغذى كل يوم، والأمر متعلق بالمراقبة لأن الناس بتختلف في الاستجابة السكرية لنفس الأكل،
أما الدكوة فقصتها مختلفة، فيها دهون وبروتين، وما في دليل قوي يقول إنها بتسبب حب الشباب مباشرة، لكن الدراسات حولها ضعيفة والملاحظة المتواترة بتقول أنها سبب رئيسي عند بعض الناس على الأقل، والمشكلة بتزيد لمن تدخل في أكل تقيل جدا، مع زيت زائد، وملح تقيل، وكمية كبيرة من الكربوهيدرات السريعة جنبها، يعني الاتزان مهم في الأكل
الوِيكة برضو ما عدوة للبشرة، بالعكس، هي جاية من البامية، وفيها ألياف ومخاط نباتي لطيف، والألياف عموما بتساعد بكتيريا الأمعاء النافعة وتدعم توازن الالتهاب، فلو الوِيكة جاية في وجبة متوازنة، ما في سبب نخاف منها، أما الشطة والأكل الحار، فالدليل ما بقول إنها بتعمل حب شباب حقيقي، لكنها ممكن تزيد التعرق والحرارة، وفي مناخ حار ورطب ممكن تخلي الكتمة والتهيج أوضح عند بعض الناس، فتزيد الحبوب بالسبب ده
منتجات الألبان عندها قصة خاصة، خصوصا الحليب الخالي من الدسم وبروتين الواي (whey protein)، لأن ارتباطها بحب الشباب أقوى من الزبادي والجبنة، بالذات لاعبو الجيم البياخدوا بروتين الواي وبتزيد حبوبهم لازم ينتبهوا للنقطة دي
الأكل ما هو المتهم الوحيد، لكنه مفتاح نقدر نمسكه، قلل السكر اليومي، خفف الحلويات، خت الألياف والخضار في الوجبة، وما تحكم على أكلك بالخوف بل بالملاحظة الهادية: بشرتك بترد على شنو؟
والعامل التاني البقدر القارئ يتحكم فيهو فورا هو منتجات العناية بالبشرة، وفيها أخطاء شائعة كتيرة، وده الحنتناولو لاحقا
#حكاية_حب_الشباب #عيادات_بيت_العافية #عيادة_الجلدية_أون_لاين