دي من أندر وأخطر صور حب الشباب، شكلها بجي فجائي وعنيف: حبوب ملتهبة كبيرة، وتقرحات، ونزف، وقشور سميكة، ومعاها أعراض عامة زي الحمى، التعب، آلام المفاصل والعظام، أحياناً الألم بكون في الترقوة أو عظمة القص أو الحوض، وفي بعض الحالات النادرة ممكن يحصل تآكل أو التهاب عظمي غير بكتيري، عشان كده أي زول بدأ إيزوتريتينوين وظهرت عندو حمى وألم عظام وحبوب نازفة ما مفروض يصبر في البيت أو يزيد الجرعة، دي حالة طبيب جلدية بسرعة
الفكرة المهمة إن العلاج هنا عكس المتوقع، ما بنزود الإيزوتريتينوين عشان "نقضي على الحبوب"، لأن النار أصلاً مولعة، فالأول لازم نطفئ الالتهاب الشديد، البروتوكولات المتفق عليها بتبدأ غالباً بكورتيزول بجرعة 0.5 إلى 1 ملغ لكل كيلوجرام يومياً، على الأقل لأسبوعين، وأحياناً أربعة أسابيع أو أكثر لو في أعراض عامة قوية، لحدي ما القرح تبدأ تهدأ وتتقشر
بعدها بندخل الإيزوتريتينوين من الباب الهادئ جداً، بجرعة صغيرة زي 0.1 ملغ لكل كيلوجرام يومياً، مع استمرار الكورتيزون، وبعد ما الجسم يثبت وما تحصل نوبة جديدة، بنبدأ نرفع الإيزوتريتينوين ببطء، ونسحب الكورتيزون تدريجياً خلال أسابيع طويلة، غالباً أربعة إلى تمانية أسابيع أو أكثر حسب الحالة، الاستعجال هنا عدو العلاج
في الحالات الشديدة المقاومة، خصوصاً لو الالتهاب ما راضي يهدأ أو في ألم عظمي متكرر، قد نحتاج علاجات بيولوجية زي Adalimumab أو Anakinra، ودي طبعاً ما مرحلة عيادة بسيطة ولا وصفة من صيدلية، ومحتاجة رعاية دقيقة لحالة التهابية خطيرة
وفي طرف تاني من القصة، عندنا علاج صغير لكنه مفيد جداً للحبة الكبيرة الواحدة: حقن الكورتيزون داخل الآفة، أو intralesional triamcinolone، دي ما نفس قصة كريمات الكورتيزون العشوائية البتخرب الوش، وما حقنة عامة للجسم، دي كمية صغيرة جداً من ترايامسينولون مخفف، غالباً بتركيز 2.5 إلى 5 ملغ/مل، تُحقن مباشرة داخل العقدة المؤلمة الكبيرة
الحبة العميقة البتطلع قبال مناسبة، زواج، تخرج، تصوير، أو اجتماع مهم، ممكن بالحقنة دي تهدأ خلال يومين تقريباً، ويقل الألم والانتفاخ، وأحياناً نمنعها من ترك ندبة كبيرة، عشان كده هي إسعاف جلدي ذكي، بشرط يعملها طبيب بعرف التركيز والعمق والكمية
في البشرة الداكنة لازم نكون حذرين، التركيز العالي أو الحقن العميق ممكن يسبب ضمور، أو يعمل فقدان تصبغ فيظهر مكان فاتح مزعج، عشان كده التركيز المنخفض والحقن الدقيق مهمين جداً
وبرضو في حالات محددة ممكن نستخدم كورتيزون فموي قصير، زي 20 إلى 40 ملغ بريدنيزون لمدة خمسة إلى سبعة أيام ثم نقلله، مثلاً قبل مناسبة كبيرة أو في تفاقم شديد فجائي قبال بداية علاج طويل المدى، بس ده قرار طبي، ما حل سريع من الصيدلية
حب الشباب الشديد مرات بحتاج أدوية قوية، ومرات يحتاج فرامل قوية قبل البنزين، وبجانب الأدوية، في طيف كامل من الإجراءات الفيزيائية، وحنبدأ بالأقدم والأرخص: التقشير الكيميائي، بالمنشور الجاي
#حكاية_حب_الشباب #عيادات_بيت_العافية #عيادة_الجلدية_أون_لاين