الإيزوتريتينوين (Isotretinoin) هو مشتق من فيتامين أ بيتاخد بالفم، وأحياناً تلقوه بأسماء تجارية زي Roaccutane أو Netlook، قوته إنو ما بشتغل في مسار واحد، بل بضرب جذور حب الشباب كلها تقريباً: بقلل إفراز الزهم بصورة كبيرة، وبغيّر البيئة البتساعد بكتيريا حب الشباب تعيش، وبنظم التقرن داخل البصيلة، وبهدئ الالتهاب، عشان كده قادر يغيّر مسار المرض ذاتو
ما بنلجأ ليهو لكل زول، مكانو الحقيقي في حب الشباب الشديد، أو العقيدي المؤلم، أو الحالات البتبدأ تترك ندبات، أو البتفشل مع العلاج الموضعي والفموي العادي، أو الحالات البتأثر نفسياً على الزول بصورة كبيرة، مرات عدد الحبوب ما بكون مهول، لكن الأثر النفسي والندبات والتصبغات بخلو القرار الطبي يمشي في اتجاهه بدري
الجرعة التقليدية غالباً بتكون بين 0.5 إلى 1 ملغ لكل كيلوجرام يومياً، والطبيب بفكر كمان في الجرعة التراكمية، غالباً حوالي 120 إلى 150 ملغ لكل كيلوجرام خلال الكورس، لأن الوصول للمدى ده بقلل احتمال الانتكاس بعد العلاج، بس ما كل الناس محتاجين نفس الجرعات العالية، وفي حالات مختارة ممكن نستخدم فيها جرعة منخفضة، زي 20 ملغ يومياً أو يوم بعد يوم، بفعالية ممتازة وتحمل أحسن، خصوصاً في الحالات المتوسطة أو الحساسة، وفي حالات خفيفة مقاومة ومزعجة ممكن الطبيب يستخدم جرعات ميكروية، زي 10 ملغ مرتين أو تلاتة في الأسبوع، لكن دي ما وصفة عامة، وبتحتاج لمتابعة وتقييم طبي دقيق
ننتبه شديد لأن الإيزوتريتينوين بسبب تشوهات جنينية خطيرة، فالحمل أثناء العلاج كارثة طبية حقيقية، أي زولة فلازم خطة منع حمل صارمة، وفحوص حمل حسب النظام الطبي، وما في تجربة ولا تهاون في النقطة دي، لكن ممكن الحمل بعد نهاية العلاج بشهر واحد بس.
الأعراض الجانبية المؤكدة غالباً معروفة: جفاف الشفايف، جفاف العين، تشققات، حساسية للشمس، وآلام مفاصل خفيفة عند بعض الناس، وصداع وأحيانا جفاف للشعر أو تساقط، في السودان، الشمس ما تفصيلة صغيرة، وواقي الشمس والمرطب ومرطب الشفايف جزء من العلاج ما كماليات، أما الفحوصات، فغالباً بنحتاج دهون الدم وإنزيمات الكبد في البداية ومع المتابعة، لكن الشباب السليمين ما محتاجين فحوصات شهرية مرهقة طول الكورس إلا لو في سبب
التوقعات لازم تكون واقعية، أول شهر ممكن الحالة تسوء شوية، وده بنسميهو initial flare، من الشهر التاني والتالت التحسن ببدأ يكون واضح، ومن الشهر الرابع للسادس كثير من الناس بدخلوا في سكون شبه كامل، بعد العلاج، حوالي سبعين بالمية بفضلوا في سكون طويل لسنين أو برجع بشكل طفيف، وحوالي تلاتين بالمية ممكن يحتاجوا كورس تاني أو علاج صيانة موضعي
الإيزوتريتينوين ما شيطان، وما لعبة، هو علاج قوي، منضبط، ومحتاج طبيب ومتابعة وفهم، الخطر الحقيقي ما في الدواء ذاتو، الخطر في استعمالو بخوف أعمى أو بتهور أعمى
وفي حالات نادرة، الإيزوتريتينوين ذاتو ممكن يشعل حالة كارثية لو اتبدأ غلط أو بجرعة عالية في الحالة الغلط، وحنفصّل فيها مع باقي حالات حب الشباب الشديدة، بالأجزاء الجاية
#حكاية_حب_الشباب #عيادات_بيت_العافية #عيادة_الجلدية_أون_لاين