مرات بنلقى إنو جلد المولود فجأة بقى مرقط أو عامل زي الشبكة، لون متداخل كأنو رخام، خصوصاً في اليدين والرجلين أو الجذع، وأول فكرة بتجي في البال: هل ده نقص أكسجين؟ هل الطفل بردان شديد؟ هل في مشكلة في الدم أو القلب؟
الحالة دي اسمها الجلد الرخامي، أو Cutis marmorata، وهي في أغلب المواليد استجابة طبيعية للبرد، لأنو الأوعية الدموية الصغيرة في جلد المولود لسه ما منظمة شغلها كويس، فلمن الجو يبرد شوية، بعض الأوعية بتنقبض وبعضها بتمدد، فيظهر الجلد بشكل شبكي أو رخامي مؤقت
في البشرة الفاتحة ممكن يظهر بلون أحمر أو أزرق خفيف، لكن في بشرة أطفالنا الداكنة ممكن يظهر بنفسجي غامق، أو رمادي، أو مجرد ترقّط أغمق من الجلد، وده أحياناً بخلي المنظر مخيف أكتر من حقيقتو، مع إنو الطفل بكون طبيعي تماماً وما عندو أي علامة تعب
المفتاح البسيط هنا هو التدفئة، لو دفّينا الطفل بهدوء، غطيناه بحاجه مناسبة، أو خليناه في جو أدفأ، واللون الشبكي اختفى أو خف بوضوح خلال وقت قصير، فده غالباً جلد رخامي طبيعي وما محتاج علاج، الحاجة المطلوبة بس تدفئة معتدلة، بدون مبالغة في اللف، لأنو المبالغة في التدفئة بتدخلنا في المشكلة الفاتت: الطفح الحراري وحمو النيل
لكن في علامات لازم ننتبه ليها، لو الشكل الرخامي ما اختفى مع التدفئة، أو كان ثابت في جهة واحدة بس من الجسم، أو معاه تقرحات أو ترقق في الجلد، أو في فرق واضح في حجم طرف مقارنة بالتاني، هنا لازم الطفل يتقيم عشان نستبعد حالة وعائية خلقية اسمها Cutis marmorata telangiectatica congenita، ودي مختلفة من الجلد الرخامي الطبيعي
وبرضو لو الترقط جاي مع زرقة في الشفايف أو اللسان، صعوبة تنفس، برودة شديدة، حمى، خمول، رفض رضاعة، أو الطفل شكله تعبان، ما بنسميه جلد رخامي ساكت، دي حالة محتاجة تقييم سريع
في البوست الجاي حنمشي لتغير لون تاني منتشر جداً في المواليد، خصوصاً في بشرتنا، بقع زرقاء أو رمادية في أسفل الظهر أو المقعدة، بتخوف الأهل أحياناً لأنها تشبه الكدمات، لكنها في الحقيقة علامة ولادة سليمة ومشهورة: البقع المنغولية أو التصبغ الجلدي الولادي
#حكاية_جلد_الصغار
#عيادات_بيت_العافية
#عيادة_الجلدية_أون_لاين