الكريم البتمسحيهو على وشك بقعد على السطح، وتحتو طبقات كل واحدة منها ليها شغل مختلف، عشان كده نعومة الوش بعد المسح، ومعالجة حبوب الوش، والتغيير المطلوب في اللدونة، نتائج مختلفة حتى لو المنتج جمعها في علبة واحدة،
نبدأ بالبشرة (Epidermis)، وهي الطبقة الخارجية البتقابل الجو والمنتجات، وتحتها الأدمة (Dermis)، الفيها الأوعية والأعصاب والبصيلات والغدد، و برضو فيها الكولاجين (Collagen) البدي الجلد قوتو، والإيلاستين (Elastin) البساعدو يتمدد ويرجع، وتحت الطبقتين ديل في نسيج دهني بساعد في العزل والحماية،
نرجع للبشرة، معظم خلاياها اسمها الخلايا الكيراتينية (Keratinocytes)، بتبدأ رحلتها من الطبقة القاعدية (آخر رصة خلايا فيها)، اللي بتنقسم الخلايا الأساسية فيها وبتتحرك بعدها الخلايا الناتجة عن الانقسام ده لفوق، وفي نفس المنطقة دي في خلايا بتنتج الميلانين (Melanin)، الصبغة البتساهم في لون جلدك، وبتوزعو على الخلايا الحوالينها، وإسمها الخلايا الصبغية Melanocyes
الخلية الطالعة لما تعدي على الطبقات الوسطى، بتبقى مفلطحة وبتجهز جواها بروتينات ودهون للوظيفة الأساسية للجلد، لما في آخر الرحلة تفقد نواتها وأجزاء من محتواها، وتبقى خلية قرنية ميتة ومنظمة مع الباقيات عشان تكوّن الطبقة القرنية (Stratum corneum)، وده هو السطح البتلامسو إيدك،
الخلايا القرنية متراصة وبيناتها دهون، ومع بعض بقللوا فقد الموية ودخول مواد من بره، وبعد أداء دورها بتنفصل بالتدريج في تقشر طبيعي غالبا ما بتلاحظيهو، عشان كده وجود الجلد الميت طبيعي وضروري، والدعك الشديد أو جمع المقشرات ممكن يخلخل الحماية دي ويعمل تهيج يتبعو تصبغ، خصوصا في البشرة الداكنة،
الرحلة بتاخد أسابيع، ومدتها بتختلف حسب العمر والمنطقة وحالة الجلد وطريقة القياس، وفي المتوسط بتاخد 28 يوم لكنو ما موعد ثابت لكل بشرة، جزء كبير من العناية اليومية بشتغل عند السطح، الغسول البنضف، والمرطب البساعد يحتفظ بالموية ويخفف الجفاف، والواقي البقلل وصول الأشعة الضارة، فالمنتج ما محتاج يصل لأعمق طبقة عشان ينفعك، المهم يشتغل في المكان المناسب لهدفو،
وفي مواد علاجية بتنفذ أبعد، حسب حجمها وخواصها وتركيبتها وحالة الجلد، اسم المادة على العلبة براهو ما بقول لينا وصلت وين أو عملت شنو، واللسعة برضو ما مقياس للنفاذ ولا للفائدة،
كريم الكولاجين مثال موحي، لأن بروتين الكولاجين الكامل جزيئاتو كبيرة ونفاذو للجلد محدود، فما بنعتبر مسحو تعويض مباشر لألياف الأدمة، كل الممكن يعملو كريم الكولاجين هو انو يرطب ويخفف ظهور خطوط الجفاف مؤقتا، لكن النعومة البعملها دي براها ما بتثبت إنو بنى كولاجين جديد،
وفي الحلقة الجاية حنقرب من الطبقة القرنية، ونشوف الخلايا والدهون بحتفظوا بالموية وبحموا الجلد كيف