القسم الرابع: خريطة الرف (٥ من ١٠) الجزء الثاني - تتمة السيروم: دور القاعدة الحاملة وكيف نختارها

عشان نفهم الفكرة دي بتفاصيلها، خلينا نتفق إنو القاعدة الحاملة للمادة الفعالة بالسيرم بتشبه العربية البتنقل السماد من المخزن لحدي جذور الزرع في حواشتك، القاعدة دي ممكن تكون بأساس مائي، أو زيتي، أو سيليكوني، أو حتى خليط معقد بيناتهم

دور العربية ما بيقيف على التوصيل بس، كمان بتحمي المادة الفعالة من إنها تتكسر وتفقد قيمتها قبل ما تصل للجلد، زي ما بحصل مع فيتامين سي البتلقاهو دايماً محتاج قواعد مخصصة تحافظ على استقرارو وتمنع أكسدتو، غير كدة، القاعدة دي هي البتتحكم في سرعة وعمق اختراق المادة الفعالة للطبقة الخارجية للجلد، يعني لو العربية دي ما مصممة تناسب طبيعة حواشتك، السماد حيقعد في السطح والجلد ما حيستفيد منو أي حاجة

طيب كيف تختاري القاعدة المناسبة ليك؟ السر كلو قاعد في نوع بشرتك وطبيعتها

لو بشرتك دهنية أو بتطلع حبوب، معناها حواشتك دي أصلاً دسمة وما بتتحمل زيادات، فهنا لازم تختاري سيروم قاعدتو مائية خفيفة أو في شكل جل، عشان الجلد يتشربو بسرعة من غير ما يكتم المسام ويخنق الوش

أما لو بشرتك جافة وبتعطش سريع، فالعربية المائية الخفيفة حتتبخر قبل ما تدي مفعولها، وهنا بتحتاجي لسيروم قاعدتو زيتية أو مستحلب تقيل شوية يوصل المادة الفعالة وفي نفس الوقت يقفل على الرطوبة جوا الجلد وما يخليها تتسرب

ولو بشرتك حساسة، الأولوية دايماً إنك تفتشي على قاعدة مهدئة وخالية من المواد البتسرع الاختراق بشدة عشان الجلد ما ينفعل ويتهيج ويديك رد فعل عكسي

فالخلاصة هي إنو المرة الجاية لمن تمسكي علبة السيروم، ما يغرك بس اسم المادة الفعالة المكتوب بالبنط العريض، ركزي في قوام السيروم نفسو وجربيهو في يدك، واسألي نفسك هل القوام ده بتناغم مع طبيعة جلدي ولا حيكون عبء عليهو، الفهم ده براهو بختصر ليك قروش كتيرة وتجارب فاشلة مع منتجات غالية جداً لكن قاعدتها الحاملة ببساطة ما بتشبه حواشتك

وفي الحلقة الجاية حنرجع للحيطة ونشوف عائلات الترطيب التلاتة بتشتغل كيف والتحيّز البيحصل فيها

⚕️ هذا المحتوى للتثقيف الصحي العام ولا يغني عن الاستشارة الطبية. لحالتك الخاصة يمكنك حجز استشارة بالعيادة.
استشارة عبر واتسابتابعنا على تلغرام