كلمة سرطان الجلد بتجمع عيلة كبيرة من الأمراض، والفرق بينها أكبر من مجرد اختلاف الأسماء، في تلاتة حنرجع ليهم كتير خلال السلسلة
سرطان الخلايا القاعدية (basal cell carcinoma) هو الأشهر عالميا، وغالبا بنمو ببطء شديد، قدرتو على الانتشار لأعضاء بعيدة نادرة جدا، ومشكلتو الأساسية إنو لو اتساب ممكن يواصل الأكل في الأنسجة الحولو، خصوصا في مناطق حساسة زي الأنف، الأضان، وحول العين
بعدو السرطان الحرشفي (squamous cell carcinoma)، وده قصتو عندنا أهم شوية، لأنو عند السمر هو غالبا أكثر سرطانات الجلد شيوعا، وعندو قدرة على الانتشار أكبر من القاعدي، وممكن يطلع من جلد اتعرض للشمس سنين، وممكن عند أصحاب البشرة الداكنة نلقاه في سياقات مختلفة: ندبة حرق، قرحة مزمنة، التهاب قديم، أو منطقة بعيدة من الشمس
التالت هو الميلانوما (melanoma)، السرطان البطلع من الخلايا الصبغية، حدوثو عند ذوي البشرة الداكنة قليل جدا مقارنة بالبيض، لكن البخلينا ناخد موضوع التأخير بجدية هو قدرتو العالية على الانتشار لما يحصل، ونوعو الطرفي البظهر في الأخمص وحول الأظافر وتحتها حيكون عندو باب كامل في السلسلة
لو الحكاية وقفت عند التلاتة ديل كان الموضوع أسهل، بس للأسف في أورام أقل شيوعا، وبعضها مهم بالذات لأنو ممكن يقعد فترة طويلة تحت اسم مرض تاني
في ورم ميركل (Merkel cell carcinoma)، عقدة صغيرة ممكن تكبر بسرعة بحافة الظفر، وفي الساركوما الليفية الجلدية البارزة (dermatofibrosarcoma protuberans)، البتبدأ أحيانا كلويحة أو عقدة بطيئة وبتتشابه مع الندبة والكلويد، وفي اللمفومة الجلدية تائية الخلايا (cutaneous T-cell lymphoma)، الممكن تقعد سنين في شكل بقع محسوبة إكزيما أو صدفية، وشكل منها في البشرة الداكنة ممكن يجي كبقع ناقصة اللون ويتلخبط مع البهاق
وعندنا ساركوما كابوزي، البقع والعقد بتاعتها ممكن تتقري ككدمة أو مشكلة في الدورة الدموية، وداء باجيت ممكن يقعد في الحلمة أو المناطق التناسلية تحت اسم إكزيما أو فطريات، وفي أورام من أعضاء داخلية ممكن يكون أول خبر عنها عقدة طلعت في الجلد
القائمة طويلة، وحفظ الأسماء ما هو المطلوب من الزول القاعد يقرا السلسلة، الحاجة المهمة إن الشكل البنشوفو بالعين ما دايما بقول لينا أصل الآفة، ورم ممكن يلبس شكل جرح أو إكزيما أو فطريات أو كلويد أو كدمة أو كيس دهني، فالضيف اللابس عباية أهل البيت مرات بتتأخر معرفتو لأنو كل العلاج ماشي ناحية اللبس، بينما المرض الجواهو مستمر
وده برضو ما سبب نخاف من كل إكزيما أو كلويد أو بقعة في الجلد، الأمراض الحميدة والشائعة أكثر بما لا يقارن، وحنخصص جزء من السلسلة للحاجات البتخوّف الناس وهي في الغالب مطمئنة
السؤال الطبي بيتغير لمن الآفة نفسها تتصرف بطريقة ما متوقعة: مفردة وثابتة في نفس المكان، بتكبر، بتنزف، بتتقرح، أو العلاج المناسب ما غيّر مسارها، وقتها الاسم القديم محتاج مراجعة، وأحيانا العينة الجلدية هي البتفصل بين الشكل والحقيقة
وقبال ما نبدأ نفك الأورام واحد واحد، في مشكلة لازم نفهمها: نفس المرض ما بظهر بنفس اللغة على كل ألوان الجلد، وفي البوست الجاي حنشوف الجلد الداكن بغيّر قراءة اللون والاحمرار والعلامات السريرية كيف