الإكزيما اللي ما بتروح

مرات الطبيب بلقى مريض بستخدم كريمات كورتيزون لشهور طويلة علشان بقعة بتاعت إكزيما أو فطريات في ضهرو أو صدرو، والبقعة دي بتخف شوية وتتهيج تاني، لكنها ما راضية تختفي كلو كلو، ولمن يعاين ليها كويس، بلقاها لوحة حمرا أو بنية، عليها قشور خفيفة، وقاعدة في مكانها ما بتتغير ولا بتنتشر لباقي الجسم

الضيف اللابس عباية أهل البيت هنا هو النوع السطحي من سرطان الخلايا القاعدية (Superficial basal cell carcinoma)، النوع ده ما بكوّن عقدة بارزة زي الشامة الاتكلمنا عنها المرة الفاتت، وإنما بتمدد أفقياً على سطح الجلد، علشان كده شكلو بكون مطابق لمرض الإكزيما أو الصدفية أو الفطريات العادية

الإكزيما مرض شائع جداً وبستجيب بسرعة لعلاجات الالتهاب الموضعية، فظهور بقعة بتشبه الإكزيما ما مفروض يفزعك ويخليك تفكر في السرطان، لكن القرينة بتنقلب لمن البقعة تكون مفردة (يعني بقعة واحدة بس في الجسم كلو)، وتكون ثابتة في مكانها لشهور طويلة، والأهم من ده كلو، انها ما بتستجيب للعلاج الصحيح المتوقع ليها

هنا الفشل العلاجي براهو بتحول لعلامة تشخيصية، الجرح أو الطفح الما بستجيب لدواهو في المدة المتوقعة، بحتاج اننا نسيب الروشتة التانية ونمشي لفحص النسيج، لأنو الخلية السرطانية ما بتخاف من مضاد الفطريات ولا بهديها الكورتيزون

لو الآفة دي اتكشفت بدري في مرحلتها السطحية، علاجها بكون بسيط جداً، وممكن يتراوح بين الاستئصال أو حتى علاجات موضعية مخصصة بتدمر الخلايا السرطانية من غير جراحة، الفكرة كلها اننا نعرف متين نشك في البقعة البتتنكر

فالعلامات البتخلينا نشك شنو بالضبط؟ في البوست الجاي حنجمع العلامات المفتاحية البتفرز السرطان القاعدي ده من غيرو، ونعرف ياتو حافة بتلمع بتدينا الجواب الأكيد