النقطة السودا ما بس شامة دايما

في البوست الفات قلنا انو سرطان الخلايا القاعدية (Basal cell carcinoma) هو الأشهر والأهدأ في عائلة سرطانات الجلد، وقلنا انو شكلو المكتوب في المراجع الطبية بختلف تماماً عن الواقع البنشوفو في بشرتنا

الكتب بتوصف السرطان ده كعقدة صغيرة لونها وردي أو لؤلؤي بتلمع، وفيها عروق دموية رفيعة، الوصف ده دقيق جداً، لكنو مبني على البشرة البيضاء، المشكلة انو في البشرة الداكنة، الخلايا السرطانية دي بتسحب معاها صبغة الميلانين وتخزنها جواها، النتيجة انو أكتر من خمسين بالمية (٥٠٪) من حالات سرطان الخلايا القاعدية في بشرتنا بتجي مصبوغة، يعني لونها بني غامق، أو أزرق مايل للسواد، أو أسود عديل، في حين انو النسبة دي بتشكل حوالي ستة لسبعة بالمية (٦-٧٪) بس عند البيض

التغير ده بوقعنا في فخ تشخيصي كبير، البقعة السودا دي بتشبه لدرجة التطابق الشامات العادية (Moles) أو التقران الدهني (Seborrheic keratosis) البعتبر من أشهر الزوائد الجلدية الحميدة عند كبار السن، الزول بعاين ليها وبفتكرها شامة طلعت متأخر، وممكن يمشي للصيدلية أو لعيادة تجميل يحاول يشيلها بالكي أو الليزر على أساس انها وساخة في الجلد، وهنا بتبدأ الكارثة لأنو الورم ما بتشال كلو، وبواصل ياكل في الأنسجة تحت الجلد في صمت

علشان كده، القاعدة الذهبية عندنا بتقول: أي «شامة» جديدة تظهر بعد عمر الأربعين وبتكبر بسرعه، أو بقعة سودا تتقرح وتنزف من ضربة خفيفة وترجع تقشر وما تندمل تماماً، دي ما شامة عادية، وإنما دي آفة بتحتاج طبيب يعاين ليها بجهاز المنظار الجلدي (Dermatoscope) وأحيانا بياخد منها عينة صغيرة للتحليل

الأورام دي رغم لونها المخيف، بتظل من النوع الما بسافر، وعلاجها بالاستئصال الجراحي البسيط بكون شافي ونهائي لو اتكشفت بدري، وفي البوست الجاي حنشوف شكل تاني خادع لنفس السرطان ده، لكن المرة دي بلبس توب مرض بنعرفو كلنا وبتعالج شهور وسنين على أساس انو إكزيما