الحرشفي، سرطاننا الأول

في عالم طب الجلدية العالمي، لمن نقول سرطان جلد، أول حاجة بتجي في الراس هي الشمس والوشوش البيضاء، لكن في بيئتنا وبشرتنا الداكنة، الخريطة بتتشقلب تماماً، السرطان الأكتر شيوعاً عندنا ما هو السرطان القاعدي Basal cell Carcinoma، وإنما هو السرطان الحرشفي (Squamous cell carcinoma)

المفارقة الكبيرة انو السرطان ده في بشرتنا ما بجي أساساً من التعرض للشمس زي ما بحصل عند البيض، الخلية الحرشفية عندنا بتتمرد وتتجنن لمن تعيش في بيئة بتاعت التهاب مزمن ودمار مستمر، علشان كده، السرطان ده بطلع عندنا غالباً في الأماكن المغطاة البعيدة من الشمس، وتحديداً في مناطق الندبات القديمة، قروح الساق الما بتندمل، حروق النار والموية الحارة من أيام الطفولة، أو الالتهابات المزمنة البتقعد سنين

الخلية البتعيش في جرح قاعد يفتح ويقفل لعشرين سنة، بتتعرض لضغط هائل، وفي النهاية قوانين الانقسام بتاعتها بتنهار، وبتتحول لخلية سرطانية، السرطان الحرشفي بيختلف عن القاعدي انو عندو قدرة فعلية على غزو الأنسجة العميقة، وممكن ينتشر للغدد اللمفاوية لو اتأخرنا عليهو، خصوصاً لو طلع في ندبة أو قرحة قديمة

علشان كده، القاعدة البنكررها دايماً: الجرح أو القرحة أو حرق الطفولة، لو فجأة ظهرت جواهو عقدة قاسية بتكبر، أو حافتو بقت بارزة ومقلوبة، أو بدأ ينزف من غير سبب، ده ما التهاب عادي، وإنما دي خلية حرشفية أعلنت التمرد، والتدخل الجراحي السريع هو الحل

وفي البوست الجاي حنشوف ورم تاني من نفس العائلة، عندو سرعة نمو بتخلع الزول، لكنو بحير الدكاترة في سلوكو