داء بوين

مرات بجينا مريض بتعالج من شهور وسنين على أساس انو عندو صدفية أو إكزيما في ساقو، بستخدم كريمات كورتيزون ومرطبات كتيرة، لكن البقعة قاعدة زي ما هي، لا بتصغر ولا بتستجيب للعلاج

البقعة دي بتكون لوحة حمرا أو بنية، عليها قشور، وثابتة في مكان واحد، الضيف اللابس عباية أهل البيت المرة دي اسمو داء بوين (Bowen's disease)، وهو في الحقيقة سرطان حرشفي موضعي (Squamous cell carcinoma in situ)

كلمة موضعي هنا بتعني انو الخلايا السرطانية دي اتجننت وبقت تنقسم بسرعة، لكنها لسه محبوسة جوا الطبقة السطحية للجلد (البشرة)، وما كسرت الغشاء القاعدي الفاصل وما غاصت في الأنسجة التحتانية

السرطان في المرحلة دي بكون مسالم ومقدور عليه، لأنو ما بمتلك القدرة على الانتشار وهجرة الخلايا عبر الدم طالما هو محبوس فوق، الفرق بينو وبين الصدفية انو الصدفية بتجي في شكل بقع كتيرة وفي أماكن متفرقة زي الركب والمرافق، بينما داء بوين بكون آفة مفردة، ثابتة، وبتكبر ببطء شديد

في بشرتنا اللون الأحمر ممكن ما يكون واضح، واللوحة دي بتظهر بلون غامق أو رمادي، وهنا بنرجع لقانون السلسلة الأساسي: أي آفة مفردة، ثابتة في مكانها، وما بتستجيب للعلاج الصحيح في المدة المتوقعة، دي ما إكزيما عنيدة، وإنما بتستدعي أخذ عينة (خزعة) علشان نعرف الحقيقة ونحسم التشخيص

داء بوين علاجو في المرحلة دي بسيط، وممكن يتم بكريمات علاجية متخصصة أو استئصال سطحي، ولمن السرطان ده يكسر الحد ويغوص لتحت، بتبدأ الحكاية التانية والأخطر، وبتحول للسرطان الحرشفي، سرطاننا الأول في البشرة الداكنة، وده حيكون موضوعنا في البوست الجاي