لمن تظهر نتيجة العينة انو الورم سرطان حرشفي عالي الخطورة، السؤال الأول البجي في راس الزول: الحيحصل شنو هسي؟
الفرق في المآل والمصير بعتمد كلياً على نقطة واحدة: هل السرطان لسه محبوس في الجلد، ولا قدر يوصل للعقد اللمفاوية؟ لو الورم اتكشف بدري وهو لسه موضعي، الاستئصال الجراحي الكامل بهامش أمان بكون شافي بنسبة بتكاد تقترب من مية بالمية (١٠٠٪)، الموضوع بنتهي بضربة مشرط وخياطة نظيفة
لكن لمن الورم يكون شايل علامات الخطورة الاتكلمنا عنها في البوست الفات، نسبة انو يهرب للعقد اللمفاوية بتقفز من الأربعة بالمية العادية وتوصل من واحد وعشرين لتلاتين بالمية (٢١-٣٠٪)، وفي أسوأ الأنواع بتصل من خمسين لسبعة وستين بالمية (٥٠-٦٧٪)
وهنا الكارثة الحقيقية، لمن السرطان يوصل العقد اللمفاوية وينتشر، فرصة البقاء على قيد الحياة لخمسة سنين بتنزل لحوالي تلاتين بالمية (٣٠٪)، ولعشرة سنين بتنزل لستاشر بالمية (١٦٪)، الأرقام دي قاسية، لكنها بتدينا رسالة واحدة واضحة: الكشف المبكر ما رفاهية، وإنما هو الحد الفاصل بين جراحة بسيطة في العيادة، وبين معركة شرسة لإنقاذ الحياة
الجرح الما بندمل، أو الندبة القديمة البتتغير وتنزف، ما مفروض نديها فرصة تهاجر، نافذة النجاة بتكون مفتوحة ومضمونة طالما الورم لسه في محلو، لكنها بتتقفل بسرعة لمن الخلايا تلقى طريقها للدم
وبكده بنكون كملنا قصة السرطان الحرشفي، لكن الأشهر في الأخبار، والأكتر إخافة للناس في عالم سرطانات الجلد، لسه ما جا
وده الضيف الحنفتح بابو في المرة الجاية، ونعرف ليه هو بالذات الأكتر رعباً