الزول مرات بتخبط في طرف باب أو سرير، وبتظهر ليهو كدمة زرقا أو بنفسجية في ساقو، الكدمة بتاخد أيام، بتغير لونها وبتختفي بالتدريج، وبرضو مع الوقفة الطويلة ومشاكل الأوردة، ناس كتار بتظهر ليهم بقع وتغيرات في لون الساق بنسميها ركود دموي،
لكن لمن الكدمة تظهر من غير ضربة، وتفضل قاعدة أسابيع وشهور وتزيد في العدد بدل ما تخف، أو تبدأ ترتفع عن سطح الجلد وتبقى زي العقدة البنفسجية أو الرمادية المايلة للسواد في بشرتنا الداكنة، هنا نحن ما قدام كدمة إنما قدام ضيف متنكر،
الورم ده اسمو ساركوما كابوزي (Kaposi sarcoma)، وهو بطلع من خلايا الأوعية الدموية ذاتها، في بيئتنا الأفريقية المرض ده عندو ارتباط وثيق بنوع من الفيروسات، وبقدر يستغل أي ضعف في جهاز المناعة عشان ينتشر في الجلد ويعمل البقع والعقد دي،
الخلط بين ساركوما كابوزي وبين الكدمات أو الدوالي العادية بضيع شهور غالية في العلاجات الغلط، الطبيب الشاطر لمن يشوف بقع بنفسجية عنيدة في الساقين ما بتختفي بالضغط، طوالي بطلب خزعة جلدية عشان يكشف هوية الخلايا دي قبال ما تتكاثر وتضرب الأوعية اللمفاوية وتعمل تورم شديد في الرجل،
ساركوما كابوزي ما شكل واحد، إنما عائلة كاملة بتختلف حسب العمر والمناعة والمنطقة الجغرافية، وفي أبواب جاية حنفصل فيها أكتر ونفهم ارتباطها ببيئتنا،
وفي البوست الجاي حننتقل لعقدة صغيرة بتطلع في الجلد وبتتشال على أساس انها كيس دهني بسيط، لكنها بتخفي وراها ورم سريع جداً،