ظهور كيس دهني صغير أو شحاذ في جفن العين حاجة مزعجة لكنها بتمر على ناس كتار، في العادة الشحاذ بكون التهاب بسيط في الغدد الدهنية بتاعت الجفن، وبتعالج بكمادات دافية وقطرات مضاد حيوي وبمشي براو في أيام أو أسابيع،
لكن الضيف المخادع بختار أضيق الأماكن عشان يتخفّى، لمن الشحاذ ده يرفض يروح، أو يختفي ويرجع تاني في نفس المكان مرة ورا مرة، أو يجي معاهو تساقط في رموش العين، دي ما التهابات عادية وإنما قرينة بتغير مسار التشخيص كلو كلو،
الورم المتخفي هنا اسمو سرطان الغدة الدهنية (Sebaceous carcinoma)، وهو ورم شرس بطلع من الغدد البتفرز الدهون في الجفن، الإحصائيات بتوري مأساة حقيقية في تأخير التشخيص، في سلسلة حالات شهيرة، الشك في السرطان ده من أول فحص كان في اتنين وتلاتين بالمية ٣٢٪ بس من المرضى، والباقين اتعالجوا فترات طويلة على أساس انو شحاذ أو التهاب جفن متكرر،
التأخير ده براهو بخلي الورم ياكل في نسيج الجفن وممكن ينتشر للغدد اللمفاوية، عشان كده قانون الباب ده صارم جدا، أي شحاذ متكرر في نفس المكان، أو التهاب في جفن واحد عند زول كبير في العمر مصحوب بتساقط الرموش، ده ما بتعالج بقطرة جديدة، وإنما بستدعي أخذ عينة من الجفن لفحص الأنسجة،
التدخل المبكر هنا ما بنقذ العين براها، وإنما بنقذ الحياة ذاتها وبمنع ورم شرس من التمدد في منطقة حساسة جدا،
وفي البوست الجاي حنشوف ورم تاني بختار شكل مألوف جدا، وبتخفى في لبس كدمة أو دوالي في الساق