الساركوما الوعائية

كدمة ظهرت في فروة رأس زول كبير في العمر، وهو ما متذكر ضربة سبقتها، وبعد أسابيع بدل ما تخف بدأت تتمدد، والجلد حولها بقى مختلف، منظر «الكدمة» هنا ممكن يغطّي على ورم نادر اسمه الساركوما الوعائية (angiosarcoma)

الورم ده بنشأ من بطانة الأوعية الدموية أو اللمفاوية، في الجلد، واحد من مواضعه المعروفة فروة الرأس والوجه عند كبار السن، وقد يظهر أيضاً في موضع تورّم لمفاوي مزمن، أو بعد علاج إشعاعي سابق، شكله ممكن يكون بقعة بنفسجية تشبه الكدمة، أو لويحة وعقد، وأحياناً fحصل تورم أو نزيف، واللون براهو ما بكفي للحكم، خصوصاً على البشرة الداكنة؛ تغيّر المساحة والملمس واستمرار النمو أهم من مطابقة الشكل واللون لصورة واحدة

الساركوما الوعائية مختلفة عن الأورام الوعائية الحميدة، ومختلفة عن كابوزي الاتكلمنا عنو في البوست ٤٤، وقد تنمو بسرعة، عشان كده لو الآفة مريبة حنحتاج ناخد خزعة لفحص النسيج، ثم تصوير لتحديد امتدادها إذا تأكد التشخيص، العلاج عادةً بخطط له فريق متخصص، وقد يجمع الجراحة والإشعاع أو علاجات أخرى حسب المكان والانتشار

الكدمات العادية كثيرة، وغالباً بنعرف سببها وبتتغير ألوانها ثم تختفي، أما العلامة البتستحق مراجعة قريبة فهي بقعة تشبه الكدمة من غير سبب واضح، وتستمر في الاتساع بدل ما تتحسن، خاصة على فروة الرأس أو فوق منطقة تورّم لمفاوي قديم

كده خلصنا جولة الأورام النادرة في الخريطة العامة، من البوست الجاي حنقرب الخريطة من أرضنا: شنو البنعرفه فعلاً عن سرطان الجلد في السودان، وشنو الأرقام الما متوفرة لسه؟

⚕️ هذا المحتوى للتثقيف الصحي العام ولا يغني عن الاستشارة الطبية. لحالتك الخاصة يمكنك حجز استشارة بالعيادة.
استشارة عبر واتسابتابعنا على تلغرام