
تمانين بالمية ٨٠٪ تقريبا دي نسبة مرضى السرطان في السودان الكانوا بتلقوا علاجهم في مركز الذرة بالخرطوم، ومعاهم المعهد القومي بود مدني، الرقم ده بورينا حقيقة صعبة، نحنا ما عندنا سجل قومي شامل لسرطانات الجلد بغطي كل الولايات والأطراف، فمعرفتنا بحجم المشكلة الحقيقي دايما بتكون تقديرية وناقصة
لكن من السجلات المتاحة، في دراسة سودانية اتعملت على ٥٣٥ مريض بسرطان الجلد، كشفت لينا طبيعة الخطر في بيئتنا، الدراسة دي لقت انو حوالي ١٤،٦٪ من الحالات دي السرطان فيها طلع في جلد كان متأذي قبال كده
وتصدرت القائمة دي ندبات الحروق القديمة، وبعدها طوالي مرض المهق Vitiligo، ثم القروح المزمنة الما بتندمل الأرقام دي بتأكد الفكرة المحورية للسلسلة دي كلها، سرطاننا الأول ما حق شمس وبحر، وإنما هو سرطان مرتبط ببيئة الجلد والالتهابات المزمنة
ورغم انو الأرقام دي مرات بتخوف، لكنها في نفس الوقت بتدينا خريطة واضحة للأماكن المفروض نراقبها ونحميها وفي فئة من أهلنا بتحمل الخطر ده مضروب في ألف، ودي الحنقيف معاها في البوست الجاي
