المهق: ألف ضعف

ألف ضعف، ده ما مجرد مبالغة في الكلام، وإنما ده رقم حقيقي بمثل زيادة خطر الإصابة بالسرطان الحرشفي عند أهلنا المصابين بالمهق في أفريقيا جنوب الصحراء مقارنة بغيرهم، لمن اتكلمنا في البوستات الفاتت عن الحماية الربانية البوفرها لينا الميلانين، كنا بنمهد للحظة دي، اللحظة البنقيف فيها مع الفئة البتفقد الدرع ده تماماً وبتواجه الشمس بصدر مكشوف

المهق (oculocutaneous albinism) بيمثل أعلى خطر جلدي للإصابة بالسرطانات في قارتنا الأفريقية، غياب الصبغة بخلي الجلد عرضة للتلف المباشر والمستمر من الأشعة فوق البنفسجية، والنتيجة ما بتكون مجرد حروق شمس عادية، بل بتتحول لأورام متعددة ومتكررة بتتركز غالباً في الرأس والرقبة،و المأساة الحقيقية بتظهر في أعمار المرضى، لأن الإصابات دي ما بتنتظر الشيخوخة، بل بتهاجم كثيرين جداً وهم لسه ما كملوا العقد الثالث من عمرهم

في سلسلة حالات اتدرست في مستشفى بوغاندو في تنزانيا، الأرقام كانت بتوجع القلب وتلخص المعاناة الحقيقية في بيئتنا، متوسط العمر للمرضى البجوا للعلاج كان تلاتين سنة بس، والوسط الحسابي لمدة الأعراض اللي قعدوا بيها قبال ما يوصلوا المستشفى كان أربعة وعشرين شهراً،يعني سنتين كاملات من المعاناة مع أورام بتكبر وتتوسع، وأغلب أسباب التأخير ده ما كانت جهل بالمرض قدر ما كانت أسباب مالية بحتة وعجز عن تكاليف الوصول للخدمة الصحية

الخلايا الجلدية عند زول المهق بتفقد قدرتها على إصلاح التلف اليومي البتعملو الشمس، فبتتراكم الطفرات بسرعة مخيفة، وبتتحول الخشونة البسيطة لسرطان غاطس بياكل في النسيج، لكن في وسط العتمة والأرقام المخيفة دي، في طاقة نور حقيقية، السرطان ده، ورغم شراسته وارتباطه الوثيق بالمهق، ما قدر محتوم ما بنقدر نغيرو، لأن الخبر الكويس إنو ده أكتر سرطان بنقدر نمنعو فعلاً

⚕️ هذا المحتوى للتثقيف الصحي العام ولا يغني عن الاستشارة الطبية. لحالتك الخاصة يمكنك حجز استشارة بالعيادة.
استشارة عبر واتسابتابعنا على تلغرام