
دايماً لمن نتكلم عن الواقي الشمسي، بتتقال جملة قاطعة ومحسومة في الإعلام الطبي: لازم تستخدم واقي شمس عشان تحمي نفسك من سرطان الجلد، الفهم ده صحيح ومثبت جداً للبشرة الفاتحة، لكن لمن ننسخ نفس الجملة دي ونلصقها حرفياً للبشرة شديدة الدكانة، بنكون خلطنا بين الثابت علمياً وبين الافتراض البفتقر للدليل
في الطب المبني على الدليل، الصدق والمنهجية بيلزمونا نفرز بين الحاجة المثبته والحاجة الما ثبتت، وندي كل حاجة وزنها الحقيقي، الحقيقة العلمية المجردة بتقول إنو الأدلة البتربط بين استخدام الواقي الشمسي ومنع سرطان الميلانوما في البشرة شديدة الدكانة تعتبر أدلة غير كافية، والقول بإن الواقي بمنع الميلانوما عندنا هو تجاوز صريح لدرجة الدليل المتاح، لأن زي ما عرفنا، الميلانوما بتاعتنا بتختار باطن القدم والأظافر والأغشية المخاطية، ودي أماكن مستقلة تقريباً عن ضربة الشمس المباشرة في الوش
طيب، هل ده معناهو نرمي الواقي الشمسي كلو كلو؟ أكيد لا، لأن الثابت والمثبت عملياً ليهو قيمة كبيرة جداً في عياداتنا، بس في اتجاه تاني خالص، الثابت علمياً هو إن الواقي الشمسي الملون، اللي بيحتوي في تركيبتو على أكسيد الحديد، بتفوق بوضوح على الواقي الشفاف غير الملون في حماية البشرة الداكنة من الضوء المرئي، وهو المسؤول الأول عن تدهور حالات الكلف وتصبغات ما بعد الالتهاب البنعاني منها بشدة في بيئتنا، فاستخدام الواقي الملون بشتغل كدرع ممتاز لمنع التصبغات المزعجة دي وتوحيد لون البشرة
فنحن بنستخدم الواقي الشمسي لسبب علاجي وتجميلي حقيقي ومثبت، بس ما بنحملو مسؤولية وقاية من سرطان ما بجينا من الشمس من الأساس، الفهم ده بريحنا من التخويف غير المبرر، وبخلينا نتعامل مع الكريمات بوعي وصدق مع معطيات جسمنا وطبيعة لوننا
وفي عامل خطر بنشوفو بعينينا كل يوم: الشامات، وده موضوع البوست الجاي
